AQSH elchixonasi vakili O‘zbekiston–Afg‘oniston chegarasiga bordi

AQSHning O‘zbekistondagi elchixonasi Xalqaro narkotik moddalar ustidan nazorat qilish va huquqni muhofaza qilish (INL) bo‘limi direktori 16–17-noyabr kunlari Termiz shahri hamda O‘zbekiston–Afg‘oniston chegarasiga tashrif buyurdi.
Tashrifdan ko‘zlangan asosiy maqsad BMTning Giyohvand moddalar va jinoyatchilik bo‘yicha boshqarmasi (UNODC) tomonidan amalga oshirilayotgan va bevosita AQSH tomonidan moliyalashtirilayotgan qo‘shma loyihalar ijrosi bilan yaqindan tanishishdan iborat bo‘ldi. Safar davomida chegaralar xavfsizligini mustahkamlash va mintaqaviy transmilliy jinoyatchilikka qarshi kurashish borasidagi amaliy ishlar ko‘zdan kechirildi.
Uchrashuvlar doirasida O‘zbekistonning Narkotik moddalar va o‘qotar qurollar ustidan nazorat qilish agentligi, Ichki ishlar vazirligi hamda Bojxona xizmati vakillari AQSH tomonidan taqdim etilgan maxsus texnik uskunalar va moliyalashtirilgan o‘quv mashg‘ulotlari ko‘magida yo‘lga qo‘yilgan ish tartib-qoidalarini namoyish etdilar. Xususan, huquq-tartibot idoralari xodimlari giyohvand moddalar kontrabandasining oldini olish, noqonuniy savdo tarmoqlari faoliyatini izdan chiqarish va narkosavdo bilan shug‘ullanuvchi shaxslarni qo‘lga olish borasidagi so‘nggi natijalarni taqdim qildi.
Elchixona bayonotida ta’kidlanishicha, Amerika Qo‘shma Shtatlari noqonuniy giyohvand moddalar savdosidan moliyalashtiriladigan transmilliy jinoiy guruhlarni aniqlash va ularning faoliyatiga barham berish yo‘lida O‘zbekistonni bundan buyon ham izchil qo‘llab-quvvatlashda davom etadi.







