Yunusoboddagi 54 yillik noyob mozaikalar buzilayotgan binodan ko‘chiriladi
Madaniy meros agentligi xabar qiladiki, sobiq tuberkulyoz dispanseri binosi demontaj qilinishi rejalashtirilgani sababli, uning tashqi devorlaridagi tarixiy-badiiy qiymatga ega mozaikalar xavf ostida qolgan edi. Monumental san’atning ushbu noyob namunalarini butun holda asrab qolish va kelajak avlodga yetkazish maqsadida ularni ehtiyotkorlik bilan yechib olish hamda boshqa joyga ko‘chirish qarori qabul qilindi.
Ushbu mozaikalar Moddiy madaniy merosning ko‘chmas mulk obyektlari milliy ro‘yxatiga kiritilishiga nomzod sifatidada alohida nazoratga olingan. Mutaxassislarning ta’kidlashicha, rang-barang smalt va maxsus mozaika elementlaridan foydalanib ishlangan ushbu kompozitsiyalar XX asrning ikkinchi yarmiga oid noyob estetik meros hisoblanadi.
Mozaikalarda inson va tabiat uyg‘unligi, mehnat, bunyodkorlik, ilm-fan hamda tinchlik g‘oyalari o‘ziga xos badiiy uslubda aks ettirilgan. Ularning ranglar jilosi va kompozitsion yechimi o‘z davrining monumental san’at an’analarini to‘liq namoyon etishi bilan alohida qiymatga ega.
