Yevropa Ittifoqi Alisher Usmonovni sanksiyadan chiqargani ortidan boshqa rossiyalik milliarderlar ham cheklovlarni bekor qildirish harakatiga tushdi
“Bloomberg” xabariga ko‘ra, bir qator biznesmenlar Fridman va Usmonov bilan bog‘liq sud va diplomatiya natijalaridan o‘z cheklovlarini bekor qilishda foydalanishni rejalashtirmoqda. Shu bilan birga, ayrim manbalar bu holatlar o‘ziga xos shart-sharoitlar asosida yuz bergani va boshqa tadbirkorlar uchun sanksiyalar bekor qilinishini kafolatlamasligini bildirgan. Ma’lumot uchun, YIning ushbu qarori bilan bir vaqtda 3 mingga yaqin jismoniy va yuridik shaxsga nisbatan cheklovlar 2029-yilgacha uzaytirilgan.
Ushbu voqealar fonida Ukraina prezidenti Vladimir Zelenskiy AQSH va Yevropa Ittifoqi rahbariyatiga murojaat qilib, Rossiyaga nisbatan bosimni susaytirmaslikka va tadbirkorlarni sanksiya ro‘yxatidan chiqarmaslikka chaqirdi. Zelenskiy AQSH prezidenti Donald Trampni yaqinda imzolangan Lindsi Grem qonuni mexanizmlarini to‘liq ishga tushirishga undadi.
Ma’lumot uchun, Tramp tomonidan imzolangan ushbu qonun hujjatiga ko‘ra, Rossiyaga va uning harbiy harakatlarini moliyalashtirayotgan subyektlarga nisbatan savdo tariflari, moliyaviy cheklovlar hamda yangi sanksiyalar ko‘lamini kengaytirish nazarda tutilgan.
Avvalroq Yevropa Ittifoqi milliarderlar Alisher Usmonov va Mixail Fridmanni individual cheklovlar ro‘yxatidan olib tashlagani hamda Rossiyaga qarshi umumiy sanksiyalar muddatini 2029-yilgacha uzaytirganini xabar qilgan edik.
