Yaponiyada o‘zbekistonlik kuryer 10 yoshli qizaloqqa tegajog‘likda gumonlanib qo‘lga olindi
Tokioning Setagaya tumanida 45 yoshli o‘zbekistonlik oziq-ovqat kuryeri maktab o‘quvchisiga nisbatan nomaqbul harakatlar qilganlikda gumonlanib qo‘lga olindi. Bu haqda Shueisha Online xabar berdi.
Nashrning yozishicha, voqea 5-iyul kuni soat 17:00 lar atrofida yuz bergan. Ota-onasi uyda bo‘lmagan qiz buyurtma qilingan taomni olish uchun eshikni ochganida, kuryer uni quchoqlab, yuzidan o‘pgan va nomaqbul harakatlar bilan tegajog‘lik qilishda gumon qilinmoqda. Qiz politsiyaga o‘zi qo‘ng‘iroq qilgan.
Gumonlanuvchi aybiga iqror bo‘lgani aytilmoqda. Shuningdek, u kuryerlik xizmatida soxta yapon fuqarosi nomidan ro‘yxatdan o‘tgan bo‘lishi mumkin. Politsiya ro‘yxat ma’lumotlari va kuzatuv kameralari yozuvlarini tekshirib, uni aniqlagan.
