O‘zbekistonda 2026 yilda baxtsiz hodisalar oqibatida 231 kishi vafot etdi

2026-yilning dastlabki 10 oyida O‘zbekistonda mehnat faoliyati bilan bog‘liq baxtsiz hodisalar oqibatida 231 kishi vafot etdi. Bu haqda Davlat mehnat inspeksiyasi ma’lum qildi.
Inspeksiya ma’lumotiga ko‘ra, shu davrda jami 771 ta baxtsiz hodisa qayd etilgan. Ularda 847 kishi jabrlangan. Hodisalarning 189 tasi o‘lim bilan tugagan, 542 tasi og‘ir oqibatlarga, 2 tasi yengil jarohatlarga olib kelgan, 38 tasi esa guruhiy baxtsiz hodisa sifatida qayd etilgan.
Hududlar kesimida eng ko‘p hodisa Toshkent shahrida — 155 ta, Toshkent viloyatida — 106 ta va Qashqadaryo viloyatida — 71 ta qayd etilgan.
Vafot etganlar soni 2025-yilning shu davriga nisbatan 37 nafarga ko‘p: o‘tgan yilning dastlabki 10 oyida 194 kishi halok bo‘lgan. Baxtsiz hodisalar soni esa 665 tadan 771 taga, jabrlanganlar soni 742 nafardan 847 nafarga oshgan.
Hodisalar eng ko‘p sanoat ishlab chiqarishida — 259 ta va qurilishda — 217 ta qayd etilgan. Boshqa sohalarda 169 ta, savdo va xizmat ko‘rsatishda 36 ta, transport va logistikada 26 ta, qishloq va suv xo‘jaligida hamda sog‘liqni saqlash va ijtimoiy xizmatlarda 23 tadan, ta’lim sohasida 18 ta baxtsiz hodisa yuz bergan.
- #baxtsiz hodisa
- #O‘zbekiston








