“Kokosh”ga nega ozodlikdan mahrum qilish jazosi tayinlanganiga izoh berildi

Toshkent shahar sudlari matbuot xizmati “Kokosh” taxallusi bilan tanilgan bloger va boshqalarga nisbatan apellyatsiya instansiyasida chiqarilgan hukm yuzasidan jamoatchilik orasida tarqalgan muhokamalarga rasmiy tushuntirish berdi.
Idora axborotida qayd etilishicha, mazkur mojaro hali huquqni muhofaza qiluvchi organlarga yetib bormasidan avval ijtimoiy tarmoqlarda sizdirilgani bois keng jamoatchilikda voqea yuzasidan biryoqlama xulosa shakllanib qolgan. Ta’kidlanishicha, jarrohlik amaliyoti asoratlari tufayli o‘ziga moddiy yoki ma’naviy zarar yetkazilgan deb hisoblagan har qanday fuqaro vakolatli organlarga qonuniy tartibda murojaat qilish huquqiga ega. Biroq bloger va uning sheriklari muammoni qonuniy yo‘l bilan emas, balki taqiqlangan usullar orqali hal qilishga uringani oqibatida tuhmat va tovlamachilik jinoyatlarini sodir etishda aybdor deb topilgan.
Sud organining tushuntirishicha, birinchi instansiya sudi chiqargan hukmning apellyatsiya bosqichida bekor qilinishi va sudlanuvchilarga nisbatan ozodlikdan mahrum qilish jazosi tayinlanishi favqulodda holat emas. Ushbu jarayon odil sudlov tizimining odatiy tartibi bo‘lib, sud qaroridan norozi bo‘lgan taraflarning shikoyat qilish huquqi qonun bilan kafolatlanganini anglatadi.
Shuningdek, bayonotda sud hukmining qonuniyligi va asosliligini tekshirish alohida huquqiy bosqich ekani qayd etilgan. Shu munosabat bilan sudlanuvchilarda ham Toshkent shahar sudi apellyatsiya instansiyasining mazkur hukmi ustidan belgilangan tartibda shikoyat kiritish huquqi saqlanib qolishi yana bir bor eslatib o‘tildi.
- #Kokosh
- #qamoq
- #izoh







