Yangi o‘quv yilida 13 mingdan ziyod ehtiyojmand o‘quvchiga 5 milliard so‘mlik yordam ko‘rsatildi
O‘zbekiston musulmonlari idorasi hamda “Vaqf” fondi hamkorligida tashkil etilgan ushbu xayriya aksiyasi doirasida kam ta’minlangan va boquvchisini yo‘qotgan oilalar farzandlari manzilli ko‘mak bilan qamrab olindi.
Xayriya tadbirining asosiy qismini O‘zbekiston musulmonlari idorasining Masjidlar bilan ishlash bo‘limi amalga oshirdi. Mamlakatimizdagi 2 161 ta masjid xodimlari jarayonga jalb etilib, 11 144 nafar ehtiyojmand va boquvchisini yo‘qotgan oila farzandlariga kiyim-kechak hamda darslik anjomlari tarqatildi. Ushbu yo‘nalishda ajratilgan beg‘araz yordamning umumiy qiymati 4 milliard 929 million so‘mdan oshdi.
Ehtiyojmand o‘quvchilarni qo‘llab-quvvatlash ishlarida “Vaqf” xayriya jamoat fondi ham faol qatnashdi. Fond tomonidan qo‘shimcha ravishda 1 500 nafar yetim va chin yetim bolalarga bayram sovg‘alari hamda o‘quv vositalari yetkazib berildi. Bunday manzilli ko‘mak, birinchi navbatda, ota-ona qaramog‘isiz qolgan va alohida e’tiborga muhtoj bo‘lgan o‘g‘il-qizlarga yo‘naltirildi.
Hududlar kesimida olib qaralganda, “Vaqf” fondi orqali eng ko‘p yordam Farg‘ona viloyatida 302 nafar, Samarqand viloyatida 243 nafar hamda Qashqadaryo viloyatida 215 nafar boquvchisini yo‘qotgan o‘quvchiga berildi. Amalga oshirilgan bu kabi tadbirlar yangi o‘quv yili oldidan ehtiyojmand oilalar og‘irini yengillatishga xizmat qiladi.
