Xitoyda bekinmachoq o‘ynab, poyezdda adashib ketgan bola 35 yildan so‘ng oilasini topdi
1991-yilda Xenan viloyatida yashagan, gapira va eshita olmaydigan Ley Zetsin do‘stlari bilan bekinmachoq o‘ynayotganda hazillashib poyezdga chiqib, o‘rindiq ostida uxlab qoladi. Uyg‘onganida esa u uyi va yaqinlaridan qariyb 1,5 ming kilometr uzoqlikdagi Shenchjen shahriga borib qolgan edi. Muloqot qila olmagani sababli u kimligini va qayerdanligini tushuntira olmay, ko‘chada uysiz bola sifatida yashay boshlagan.
Vokzal yaqinidagi restoran egasi Xun Syan Syan adashib qolgan bolani o‘z qaramog‘iga oladi. Xun va uning rafiqasi o‘zlarining ikki farzandi bo‘lishiga qaramay, Leyga qariyb 30 yil davomida o‘z farzandidek g‘amxo‘rlik qilib, unga ish topib berishadi hamda politsiyaga murojaat qilib, gazetalarda qidiruv e’lonlari berishda yordam berishadi. Ley ham bu yillar davomida oilasini izlashdan voz kechmay, bolalik xotiralari bo‘yicha hududlarni poyezdda kezib chiqadi.
Nihoyat, Leyning o‘zi kabi kar va so‘zlay olmaydigan akasi Ley Zexu messenjer guruhlarining birida ukasining qidiruv xabarini ko‘rib qoladi. Leyning bolaligidan ism-familiyasini teskari tartibda yozish odati saqlanib qolgani akasiga uni tanib olishga yordam bergan. Shundan so‘ng topshirilgan DNK tahlili natijalari ularning haqiqatan ham aka-uka ekanini tasdiqladi.
2026-yil 11-iyun kuni Ley otasi, akasi va opasi bilan 35 yillik ayriliqdan so‘ng Shenchjenda ko‘z yoshlar bilan ko‘rishdi. Leyning biologik oilasi unga o‘ttiz yil davomida begaraz g‘amxo‘rlik qilgan Xun va uning turmush o‘rtog‘iga alohida minnatdorlik bildirdi. Ley esa ham biologik ota-onasi oldidagi burchini, ham o‘ziga boshpana va mehr bergan Shenchjendagi oilasini hech qachon unutmasligini ma’lum qildi.
