Xalqaro imtihonlarda yuqori ball olgan 74 mingdan ortiq yoshga 151 milliard so‘m kompensatsiya to‘lab berildi
Yoshlar ishlari agentligi taqdim etgan ma’lumotlarga ko‘ra, ushbu kompensatsiya tizimi hozirda 16 ta nufuzli xalqaro imtihon turini qamrab olgan.
Dastur doirasida eng katta mablag‘ IELTS topshirgan yoshlarga to‘g‘ri kelmoqda. Hozirgacha 54 048 nafar nomzodga IELTS imtihoni xarajatlari uchun 125 milliard so‘m ajratilgan bo‘lsa, SAT imtihoni bo‘yicha 9 082 nafar yosh kompensatsiya olgan. Shuningdek, ro‘yxatdan TOEFL, TOPIK, TestDaF, JLPT, GMAT va GRE kabi til hamda akademik bilimni baholovchi boshqa xalqaro imtihonlar ham joy olgan.
Mablag‘ olganlarning asosiy qismini – ya’ni 79 foizini 14 yoshdan 23 yoshgacha bo‘lgan yoshlar tashkil etadi. Umumiy statistika bo‘yicha kompensatsiya imkoniyatidan 38 503 nafar qiz va 35 599 nafar yigit unumli foydalangan. Hududiy kesimda esa eng yuqori ko‘rsatkich Toshkent shahriga to‘g‘ri kelib, poytaxtdagi 24 mingdan ziyod yoshga 51,1 milliard so‘m to‘langan. Keyingi o‘rinlarni Farg‘ona, Buxoro va Samarqand viloyatlari egallamoqda.
Ushbu qo‘llab-quvvatlash ko‘lami yil sayin kengayib bormoqda. Agarda 2025-yilda 17 261 nafar yoshning xarajatlari qoplangan bo‘lsa, 2026-yil yakuniga qadar yana 25 850 nafar nomzodga 57 milliard so‘m yo‘naltirilishi rejalashtirilgan.
Bundan tashqari, belgilangan 12 ta hududda doimiy yashovchi yoshlar uchun IELTS bo‘yicha kamida 6 ball yoki TOEFL’dan 60 ball topshirgan taqdirda ham xarajatlar to‘liq qoplab berilishi belgilangan.
