Venesuelada zilzila qurbonlari soni 2 500 nafardan oshdi
Venesuelada joriy yilning 24-iyun kuni sodir bo‘lgan kuchli zilzilalardan so‘ng qurbonlar soni 2 500 nafardan oshgan, minglab odamlar esa hanuz bedarak yo‘qolganlar ro‘yxatida qolmoqda. 7,2 va 7,5 magnitudali ikki zilzila oqibatida Karakas hamda eng ko‘p zarar ko‘rgan La-Guayra shtatida yuzlab binolar vayron bo‘lgan.
Mamlakatda qutqaruv ishlari sust olib borilgani va qurbonlar soni ataylab kamaytirib ko‘rsatilgani haqida hukumatga qarshi tanqidlar avj olgan. Muvaqqat Prezidenti Delsi Rodriges hukumatning favqulodda vaziyatga munosabati yuzasidan bildirilgan tanqidlarni rad etgan.
Rodrigesning ta'kidlashicha, qutqaruv xizmatlari zilziladan so‘ng darhol safarbar etilgan va hukumat barcha mavjud kuchlarni ishga solgan. Shu bilan birga, xalqaro qutqaruv guruhlari ham tabiiy ofat oqibatlarini bartaraf etishda faol ishtirok etmoqda.
Qidiruv-qutqaruv ishlarining to‘qqizinchi kuniga kelib tirik qolganlarni topish umidi deyarli so‘ngan. Endilikda asosiy e'tibor vayronalar ostidagi jasadlarni olib chiqish va jabrlanganlarga yordam ko‘rsatishga qaratilgan. Mahalliy morglar to‘lib ketgani sababli vaqtinchalik saqlash punktlari tashkil etilgan, mutaxassislar esa barcha jasadlarni yig‘ish bir necha oy davom etishi mumkinligini bildirmoqda.
