Turkiy davlatlar jinoyatchilarni va bedarak yo‘qolganlarni birgalikda qidiradi
Ostona shahrida o‘tgan TDTga a’zo davlatlar ichki ishlar vazirlarining uchinchi yig‘ilishida O‘zbekiston, Qozog‘iston, Ozarbayjon, Qirg‘iziston hamda Turkiya huquq-tartibot idoralari rahbarlari ishtirok etdi. Muzokaralar davomida tomonlar tezkor ma’lumotlar almashishni jadallashtirish va sohaviy bo‘linmalar o‘rtasidagi to‘g‘ridan-to‘g‘ri hamkorlikni yangi bosqichga olib chiqish masalalarida yakdillik bildirdi.
Qozog‘iston IIV ma’lumotlariga ko‘ra, o‘tgan yildan beri mamlakat huquqni muhofaza qiluvchi organlari TDTga a’zo sheriklar uchun 344 nafar shaxsni topishga ko‘maklashgan, hamkor davlatlar yordamida esa Qozog‘iston tomonidan qidirilayotgan 82 kishi ushlangan. Uchrashuvda, shuningdek, jinoyatchilikka qarshi kurashish bo‘yicha alohida Kengash tuzish loyihasi muhokama qilindi hamda tegishli bitimni kelgusi yig‘ilishlarda imzolash rejalashtirildi.
Yig‘ilish kun tartibidan kiberjinoyatchilik, noqonuniy qimor o‘yinlari, terrorizm, odam savdosi va transmilliy uyushgan jinoyatchilikka qarshi birgalikda kurashish masalalari joy oldi. Tadbir yakunida tomonlar axborot almashinuvi va sa’y-harakatlarni muvofiqlashtirishni nazarda tutuvchi qo‘shma kommyunikeni imzoladilar. Ma’lumot uchun, ushbu formatdagi ilk uchrashuv 2024-yilda Cho‘lpon-Otada, ikkinchisi esa 2025-yilda Bokuda bo‘lib o‘tgan edi.
