Toshkentda odamlarga va mol-mulkka xavf tug‘diruvchi barcha daraxt va butalar xatlovdan o‘tkaziladi
Tekshiruvlar natijasida o‘simliklarning turi, yoshi, joylashuvi va holati haqidagi ma’lumotlarni o‘z ichiga olgan yashil o‘simliklar reyestri shakllantiriladi.
Xatlov jarayonlarini tashkil etish uchun poytaxt hokimining birinchi o‘rinbosari Baxtiyor Rahmonov boshchiligida maxsus ishchi guruh tuzildi. Guruh a’zolari bevosita joylarga chiqqan holda ma’lumotlarni to‘playdi va ularni reyestrga kiritib boradi. Agar o‘simlik xavfli deb topilsa, tegishli hudud uchun mas’ul shaxslar uni kesish bo‘yicha belgilangan tartibda ariza topshirishi talab etiladi.
Toshkent shahar Ekologiya boshqarmasi joylarda tanlanma tekshiruvlar o‘tkazib, umumlashtirilgan hisobotlarni har chorakda shahar hokimligiga taqdim etib boradi. Ma’lumotlar haqqoniyligi uchun tashkilot va korxonalar rahbarlari shaxsan javobgar bo‘lishi belgilangan.
Shahar ma’muriyati xatlovdan maqsad aholi xavfsizligini ta’minlash va ehtimoliy xavflarning oldini olish ekanini ta’kidlamoqda. Shu bilan birga, xavfli deb topilgan har qanday daraxt ham qo‘porib tashlanmaydi, ayrim vaziyatlarda faqat shamolda sinib tushishi mumkin bo‘lgan quruq va kasallangan shoxlarni kesish bilan cheklanadi.
