Toshkent davlat texnika universitetining hujjatsiz va isitish tizimi ishlamaydigan turarjoyiga talabalar joylashtirildi
Ta’lim va ilm-fan vazirligi holat yuzasidan munosabat bildirib, bino hali rasman foydalanishga topshirilmagani hamda kadastr hujjatlari tayyor emasligini ma’lum qildi.
O‘rganishlar davomida xususiy tadbirkor tomonidan belgilangan tartibga zid ravishda, rasmiy yo‘llanmasiz va hatto boshqa oliygohlar hamda xorijlik talabalar bino ichiga joylashtirilgani aniqlangan. Obyektda issiq suv hamda isitish tizimlari ishga tushirilmagani sababli, xavfsizlik va maishiy sharoitlarni ta’minlash maqsadida barcha talabalar zudlik bilan chiqarilib, universitetning mavjud bo‘sh yotoqxonalariga vaqtincha ko‘chirildi.
Vazirlik va universitet rahbariyati tadbirkorning bu xatti-harakatlaridan oldindan xabardor bo‘lmaganini bildirgan.
Qayd etilishicha, noqonuniy joylashtirish davomida talabalardan undirilgan to‘lovlar tadbirkor tomonidan 100 foiz miqdorida to‘liq qaytarib berilishi ta’minlandi.
Hozirgi vaqtda obyektning kadastr hujjatlarini rasmiylashtirish va foydalanishga topshirish bo‘yicha texnik ishlar davom etmoqda. Barcha ruxsatnomalar olingach, talabalarni joylashtirish “my.gov.uz” portali orqali rasmiy tartibda amalga oshiriladi.
