Surxondaryoda o‘quvchiga shilqimlik qilgan texnikum xodimi ishdan olindi. Direktor o‘rinbosari va psixolog ham ishdan ketdi
Surxondaryo viloyati Jarqo‘rg‘on tumanida o‘quvchiga shilqimlik qilgan 2-son texnikumi xodimining ishdan olindi. Bu haqda Kasbiy ta’lim agentligi axborot xizmati ma’lum qildi.
Agentlik xabariga ko‘ra, o‘quvchining otasi 30-sentabr kuni ichki ishlar organlariga murojaat qilgan. Agentlik tomonidan tuzilgan ishchi guruhi texnikumda xizmat o‘rganishini o‘tkazgan. Holat yuzasidan sud muhokamasi o‘tkazilib, qonunchilikka muvofiq jazo chorasi qo‘llangan.
Xizmat o‘rganishi natijasida texnikumning yoshlar bilan ishlash bo‘yicha direktor o‘rinbosari I. Chorshanbiyev va psixologi Y. Kenjayeva lavozimidan ozod etildi. Yana uch xodimga hayfsan berildi. O‘quvchiga nisbatan nomaqbul xatti-harakat sodir etgan ishlab chiqarish ta’limi ustasi K. E. Erniyozov bilan mehnat shartnomasi bekor qilindi.
O‘zi nima bo‘lgan edi?
Sud ma’lumotiga ko‘ra, 25-sentabr kuni Jarqo‘rg‘on tumanidagi texnikumning ishlab chiqarish ta’limi ustasi fizika darsi paytida voyaga yetmagan o‘quvchini auditoriyadan olib chiqib, shahvoniy tusdagi harakatlar qilgan. Qiz qarshilik ko‘rsatib, xonadan qochgan. Darslardan so‘ng xodim uni yana sportzalga chaqirib, shilqimlik qilganida o‘quvchi u yerdan ham qochib chiqqan.
Qiz voqea haqida dastlab hech kimga aytmaganini, keyinroq direktoriga murojaat qilganini bildirgan. Erkak o‘quvchini darsdan olib chiqqanini tan olgan, biroq shahvoniy harakatlar qilganini rad etgan. Sud uni Ma’muriy javobgarlik to‘g‘risidagi kodeksning 41-1-moddasi 1-qismida nazarda tutilgan huquqbuzarlik bo‘yicha aybdor deb topib, 5 sutkaga ma’muriy qamoqqa hukm qilgan.
