Shohsupada Isroil bayrog‘ini ko‘targan oltin medal sohibi g‘oliblar ro‘yxatidan o‘chirilgani aytilmoqda
Isroilning “Kan” teleradioeshittirish kompaniyasi ma’lumotlariga ko‘ra, Isroil terma jamoasi vakillariga musobaqada o‘z milliy ramzlari ostida qatnashish bo‘yicha cheklovlar qo‘yilgan. Shunga qaramay, 12-sinf o‘quvchisi Yotam Budnik taqdirlash jarayonida sahnaga Isroil bayrog‘i bilan chiqqan. Ushbu harakat tashkilotchilar tomonidan turnir qoidalarini buzish deb baholanib, ishtirokchining rasmiy natijalari bekor qilingan.
Mojaro ortidan tashkilotchilar o‘quvchidan topshirilgan oltin medalni qaytarib berishni talab qilgan, biroq isroillik o‘quvchi uni berishdan qat’iy bosh tortgan. Budnik qo‘yilgan taqiqlarni siyosiy qaror deb atab, sodir bo‘lgan diskvalifikatsiya uning erishgan ilmiy muvaffaqiyati va g‘alabasini shubha ostiga qo‘ya olmasligini ta’kidlagan.
E’tiborlisi, ushbu voqeadan bir necha hafta ilgari Shanxayda o‘tkazilgan matematika olimpiadasida ham Budnik Isroil bayrog‘ini ochiqchasiga ko‘rsatgan va hech qanday sanksiyaga uchramagan.
Ma’lumot uchun, bu cheklov aynan 2026-yilgi Toshkent olimpiadasi uchun o‘ylab topilgan qoida emas. 2024-yil sentyabrida IOI Bosh Assambleyasi G‘azodagi urush bilan bog‘liq vaziyat yuzasidan Isroilga nisbatan sanksiya joriy etishga qaror qilgan.
Mazkur holat yuzasidan izoh olish maqsadida Portal24.uz tahririyati O‘zbekiston Respublikasi Raqamli texnologiyalar vazirligi bilan bog‘lanishga urindi. Biroq mas’ullar qo‘ng‘iroqlarga javob bermadi va hozircha ushbu hodisa bo‘yicha rasmiy munosabat bildirilmadi.
