Shavkat Mirziyoyev Seulda Koreyadagi o‘zbekistonliklar bilan uchrashdi
Seuldagi uchrashuv davomida davlat rahbari yurtdoshlarimiz bilan samimiy muloqot o‘tkazib, ularning o‘qish va ish jarayonlari hamda kelajakdagi rejalari bilan qiziqdi. Suhbat chog‘ida mamlakatimizda amalga oshirilayotgan islohotlar va Koreyada egallanayotgan zamonaviy bilim hamda tajriba kelgusida O‘zbekiston taraqqiyotiga xizmat qilishi ta’kidlandi. Prezident vatandoshlarga o‘z faoliyatlarida muvaffaqiyatlar tiladi.
Koreya Respublikasi Harbiy-havo kuchlarining Seuldagi aviabazasida O‘zbekiston delegatsiyasini kutib olish marosimi bo‘lib o‘tdi. Oliy martabali mehmon sharafiga faxriy qorovul saf tortib, artilleriya salyuti berildi. Aeroportda davlat rahbarini Janubiy Koreya Bosh vaziri o‘rinbosari va boshqa rasmiy shaxslar kutib oldi.
Tashrifning keng qamrovli dasturiga ko‘ra, Prezident Shavkat Mirziyoyev Janubiy Koreya Prezidenti Li Chje Myon bilan tor va kengaytirilgan tarkibda muzokaralar o‘tkazadi. Shuningdek, Milliy Assambleya Spikeri, Bosh vazir hamda Janubiy Koreyaning yetakchi kompaniyalari va moliya institutlari rahbarlari bilan uchrashuvlar rejalashtirilgan. Davlat rahbari biznes-forumi hamda 16-sentabr kuni o‘tadigan birinchi “Markaziy Osiyo – Koreya Respublikasi” sammitida ham ishtirok etadi.
