Sharipov vazirlikdan kuzatib qo‘yildi
Qayd etilishicha, sobiq rahbar Qo‘ng‘irotboy Sharipov uch yillik faoliyati davomida ochiq muloqot va vazmin boshqaruv uslubi bilan jamoa hamda OAV vakillari hurmatiga sazovor bo‘lgan.
So‘nggi yillarda sohada qabul jarayonlarini raqamlashtirish, korrupsion xavflarni kamaytirish hamda “avval test, keyin tanlov” mexanizmini joriy etish orqali abituriyentlarga keng imkoniyatlar yaratildi. Shuningdek, oliygohlar soni 200 dan oshib, qamrov darajasi keskin kengaytirildi va talabalarni yotoqxona hamda ijara xonadonlariga joylashtirishning tizimli boshqaruvi yo‘lga qo‘yildi.
Keyingi bosqichda asosiy e’tibor muhandislik va texnik yo‘nalishlarga qaratildi. Reallikda mehnat bozori texnolog, muhandis va konstruktorlarga ehtiyoj sezayotgani bois, ta’limni ishlab chiqarish bilan bog‘laydigan dual ta’lim tizimi yo‘lga qo‘yildi hamda soha mutaxassislarini rag‘batlantirish choralari ko‘rildi.
Bugungi kunda ta’lim tizimida maktabgacha ta’limdan tortib oliy va oliy ta’limdan keyingi bosqichlargacha bo‘lgan barcha bo‘g‘inlarni uzviy bog‘lash hamda bitiruvchilarning bandligini ta’minlash ustuvor vazifa sifatida belgilangan.
