Seulda Markaziy Osiyo va Janubiy Koreya rahbarlarining ilk sammiti bo‘lib o‘tadi
Ushbu sammit Janubiy Koreya hamda Mintaqa mamlakatlari – O‘zbekiston, Qozog‘iston, Qirg‘iziston, Tojikiston va Turkmaniston o‘rtasidagi munosabatlar tarixidagi ilk oliy darajadagi ko‘p tomonlama uchrashuv bo‘ladi. Seulda o‘tadigan muzokaralarda o‘zaro savdo-sotiq, sarmoyalar, energetika, strategik minerallar resurslari hamda xalqaro ta’minot zanjirlarini rivojlantirish masalalari diqqat markazida bo‘ladi.
Katta sammit oldidan, 14-16-sentyabr kunlari Janubiy Koreya yetakchisi Markaziy Osiyoning har bir davlati rahbari bilan alohida ikki tomonlama uchrashuvlar o‘tkazishi rejalashtirilgan. Li Je Myonning ta’kidlashicha, ushbu tadbirlar Tomonlar o‘rtasidagi muloqotni oliy darajadagi doimiy ko‘p tomonlama hamkorlik formatiga olib chiqishga xizmat qiladi.
Rasmiy Seul Markaziy Osiyo hududi bilan iqtisodiyot, energetika va infratuzilma sohalaridagi aloqalarni mustahkamlashni o‘zining “Yangi shimoliy siyosati” doirasidagi eng ustuvor yo‘nalishlardan biri sifatida ko‘rmoqda. Muzokaralar yakunida hududlararo hamkorlikni yangi bosqichga olib chiquvchi qator hujjatlar imzolanishi kutilmoqda.
