Rossiya va Shimoliy Koreya o‘rtasida ilk avtomobil ko‘prigi ochildi. Harbiy logistika kuchayishi taxmin qilinmoqda
Yangi ko‘prik qurilishi Vladimir Putinning 2024-yildagi Shimoliy Koreyaga tashrifi chog‘ida erishilgan kelishuvlar asosida 2025-yilda boshlangan edi. Bor-yo‘g‘i 495 kun ichida barpo etilgan ushbu strategik obyektni Rossiya Bosh vaziri Mixail Mishustin do‘stlik ramzi deb atagan bo‘lsa, KXDR Bosh vaziri Pak Txe Song uni tarixiy voqea sifatida baholadi. Rossiya tomonining ma’lum qilishicha, inshootdan dastlab faqat yuk tashishda foydalaniladi, keyinchalik esa yo‘lovchilar qatnoviga ham ruxsat beriladi.
Texnik imkoniyatlariga ko‘ra, ko‘prik orqali bir sutkada 300 tagacha avtomobil hamda 2 300 nafardan ortiq yo‘lovchi o‘tishi ko‘zda tutilgan. Rasmiylar ushbu loyiha turizm, savdo-sotiq hamda mutaxassislar almashinuvini rivojlantirishga xizmat qilishini ta’kidlashmoqda.
Biroq g‘arb tahlilchilari va xalqaro kuzatuvchilar voqeaga boshqacha baho bermoqda. Xususan, Ukrainaning Truth Hounds OSINT guruhi mazkur yangi yo‘l ikki mamlakat o‘rtasidagi harbiy-logistika hamkorligini yanada kuchaytirishi va harbiy yuklar harakatini tezlashtirishi mumkinligidan xavotir bildirdi.
