Rossiya O‘zbekistonda o‘z fuqarolari uchun davlat xizmatlari markazini ochmoqda
Rossiya bosh vaziri o‘rinbosari Dmitriy Grigorenkoning ma’lum qilishicha, ushbu yo‘nalishdagi birinchi tajriba loyihasini O‘zbekistonda ishga tushirishga tayyorgarlik ko‘rilmoqda.
Yangi xizmat ko‘rsatish nuqtasi poytaxt Toshkent shahridagi Rossiya uyida faoliyat boshlaydi. Bu yerda rossiyaliklar uchun eng zarur va talab yuqori bo‘lgan xizmatlar, jumladan, SNILS (shaxsiy sug‘urta hisob raqami) hamda elektron raqamli imzo rasmiylashtirish imkoniyati yaratiladi.
Ushbu loyiha bosqichma-bosqich kengaytirilib, yaqin oylarda Qozog‘istonda ham joriy etilishi rejalashtirilgan. Rasmiy idoralar xabariga ko‘ra, kelgusida ushbu tizim imkoniyatlaridan xorijiy fuqarolar ham foydalanishlari mumkin bo‘ladi.
