Turkmaniston bilan 3 kunlik vizasiz rejim joriy etilishi mumkin

O‘zbekiston tashqi ishlar vaziri o‘rinbosari Olimjon Abdullayev hamda Turkmanistonning O‘zbekistondagi elchisi Shodurdi Meredov o‘rtasida 18-noyabr kuni bo‘lib o‘tgan uchrashuvda ikki mamlakat o‘rtasidagi aviaqatnovlar va chegaraoldi bordi-keldini yengillashtirish masalalari ko‘rib chiqildi.
Tashqi ishlar vazirligi axborotiga ko‘ra, muloqot davomida tomonlar 2004-yilda imzolangan hukumatlararo bitim doirasida belgilangan chegaradosh hududlar aholisining uch sutkagacha vizasiz harakatlanish tartibini qayta tiklash imkoniyatlarini muhokama qilgan. Shu bilan birga, Toshkent – Ashxobod – Toshkent yo‘nalishi bo‘yicha muntazam havo qatnovlarini yo‘lga qo‘yish yuzasidan ham o‘zaro fikr almashilgan, biroq yangi reyslar va vizasiz tartibning aniq qachondan kuchga kirishi hozircha ochiqlanmagan.
Uchrashuv kun tartibidan ikki davlat o‘rtasidagi transport-logistika aloqalarini kengaytirish, xalqaro yuk tashish jarayonlarini soddalashtirish hamda chegara o‘tkazish punktlari faoliyatini takomillashtirish masalalari ham o‘rin oldi. Bundan tashqari, diplomatlar fuqarolarning huquq va qonuniy manfaatlarini himoya qilish va vakolatli idoralar o‘rtasida tezkor axborot almashinuvini yaxshilash bo‘yicha hamkorlikni kuchaytirishga e’tibor qaratdilar.
Muzokaralar yakunida ko‘tarilgan barcha tashabbuslarni tegishli vazirlik va idoralar ishtirokida batafsil ishlab chiqish hamda ikki tomonlama amaliy hamkorlikni izchil davom ettirishga kelishib olindi.
- #vizasiz rejim
- #Turkmaniston
- #chegara









