“Eski Jo‘va” bozorida Bosh vazirga shikoyat qilmoqchi bo‘lgan sotuvchi 3 sutkaga qamaldi

“Ezgulik” inson huquqlari jamiyati raisi Abdurahmon Tashanov 16-noyabr kuni Bosh vazir Abdulla Aripovning poytaxtdagi “Eski Jo‘va” bozoriga tashrifi oldidan ichki ishlar xodimlari sotuvchi Sanjar Karimovni olib ketib, ma’muriy qamoqqa oldirgani haqida xabar berdi, Toshkent shahar sudlari esa holat yuzasidan rasmiy munosabat bildirdi.
Huquq faolining ma’lum qilishicha, bozordagi sotuvchilardan biri Sanjar Karimov hukumat rahbarini ko‘rib qolsa, qamoqdagi blogger amakisi G‘ayrat Karimovning ishi yuzasidan shikoyat qilmoqchi ekanini atrofdagilarga aytgan. Shundan so‘ng huquq-tartibot idoralari xodimlari uni bozordan olib chiqib ketishgan va Jinoyat ishlari bo‘yicha Shayxontohur tuman sudi qarori bilan yigit 3 sutkaga qamalgan. Tashanovning qayd etishicha, ushbu holat aks etgan videoni taqdim etgan qarindoshi ham avvalroq xuddi shu sabab bilan bir necha bor ma’muriy qamoqqa olingan.
“Buni Bosh vazirimiz biladimi-yo‘qmi, bilmayman, ammo uning tashrifi bozorchilarga qimmatga tushmoqda. Afsuski, odil sudlov tushunchasi yo‘q darajada, bu idora militsiyalarning ishlarini qonunlashtirib beradigan shunchaki notarial idoraga aylangan”, deya yozadi Abdurahmon Tashanov o‘z sahifasida.
Mazkur bayonot ortidan Toshkent shahar sudlari matbuot xizmati munosabat bildirib, ijtimoiy tarmoqda tarqalgan videotasvir va izohlar asosida vaziyatga uzil-kesil baho berib bo‘lmasligini ta’kidladi. Rasmiy axborotga ko‘ra, 1993-yilda tug‘ilgan fuqaro S. K. haqiqatan ham Shayxontohur tuman sudining qarori bilan Ma’muriy javobgarlik to‘g‘risidagi kodeksning 194-moddasi 2-qismi (ichki ishlar organlari xodimining qonuniy talabini bir yil davomida takroran bajarmaslik) bo‘yicha aybdor deb topilgan va unga 3 sutka ma’muriy qamoq jazosi tayinlangan.
“Holat bo‘yicha ma’muriy huquqbuzarlikka oid ish ochilib, sud qarori chiqqan ekan, unga huquqiy baho berish alohida jarayonni talab qiladi. Buning uchun sud hujjatiga nisbatan tegishli tartibda shikoyat berilishi shart”, deyiladi sud organining rasmiy bayonotida.
Shuningdek, Toshkent shahar sudlari huquqbuzarlikda ayblangan shaxsga sud qarori ustidan shikoyat kiritish tartibi va muddatlari tushuntirilganini, biroq hozirgi vaqtga qadar sudga bu borada hech qanday shikoyat kelib tushmaganini qo‘shimcha qildi.
- #Abdurahmon Tashanov
- #“Eski Jo‘va”
- #qamoq
- #Abdulla Aripov







