Nukusda zararli APK fayllar orqali qariyb 1 mlrd so'm o'zlashtirgan “Sanjik” va uning sheriklari ushlandi

Nukus shahrida Telegram orqali zararli APK fayllar tarqatib, fuqarolarning bank kartalaridan 1 milliard so‘mga yaqin mablag‘ni noqonuniy o‘zlashtirganlikda gumonlangan guruh qo‘lga olindi. Tezkor tadbir Qoraqalpog‘'iston Respublikasi IIV va DXX boshqarmalari xodimlari tomonidan o‘tkazilgan.
Aniqlangan sxemaga ko‘ra, yopiq Telegram guruhlarida o‘zini “Sanjik” taxallusi bilan tanitgan shaxs va uning sheriklari kartalardan yechilgan pullarga qimmatbaho telefonlar xarid qilib, ularni qayta sotish orqali naqdlashtirgan. Shuningdek, o‘zlashtirilgan mablag‘lar noma’lum shaxslarning onlayn mikroqarzlarini so‘ndirishga hamda onlayn bukmekerlik akkauntlariga o‘tkazilgan. Izlarni yashirish maqsadida ijaraga olingan telefonlar muntazam almashtirib turilgan.
Tekshiruv davomida Telegram yozishmalarida 162 ta bank kartasining ma‘lumotlari mavjudligi aniqlanib, 3 ta mobil qurilma va 5 ta bank kartasi ashyoviy dalil sifatida rasmiylashtirilgan. Sud qarori bilan B. ismli gumonlanuvchiga nisbatan qamoqqa olish ehtiyot chorasi qo‘llanilib, hozirda dastlabki tergov harakatlari olib borilmoqda.
Mas’ullar fuqarolarni Telegram’da tarqalayotgan noma’lum APK fayllarni ochmaslikka, bank kartasi ma’lumotlari hamda SMS-kodlarni hech kimga bermaslikka, shuningdek, kreditlarni qoplab berishni va’da qiluvchi firibgarlarga ishonmaslikka chaqirmoqda.
- #Nukus
- #Qoraqalpog'iston
- #APK fayl
- #Sanjik








