“Rayhon” ovqatlanish tarmog‘i ta’sischisi Odilxon Ismoilov ozod qilindi
Namangan viloyat sudi jinoyat ishlari bo‘yicha Pop tuman sudi tomonidan “Rayhon oilaviy milliy taomlari” ta’sischisi Odilxon Ismoilov va boshqalarga nisbatan chiqarilgan hukm ustidan berilgan apellyatsiya shikoyatini ko‘rib chiqdi. Bu haqda Namangan viloyati sudlari matbuot xizmati xabar berdi.
Ma’lum qilinishicha, jinoyat ishi doirasida yetkazilgan zararning bir qismi naqd pul shaklida depozit hisob raqamiga topshirilgan, Odilxon Ismoilovga tegishli mulk bankning talabiga asosan bank balansiga qabul qilinishi belgilangan. Shuningdek, xatlangan mulklar sotilib, zararni qoplashga yo‘naltirilgan.
Ushbu holatlardan kelib chiqib, apellyatsiya instansiyasi Odilxon Ismoilovga Jinoyat kodeksining 167-moddasi 3-qismi “a” bandi bilan tayinlangan jazoni o‘zgarishsiz qoldirdi, biroq Jinoyat kodeksining 72-moddasiga (Shartli hukm qilish) asosan 3 yil sinov muddati belgiladi.
Shu tariqa u sud zalida qamoqdan ozod qilindi.
Odilxon Ismoilov JIB Pop tuman sudining 2026-yil 13 iyuldagi hukmi bilan 8 yil muddatga ozodlikdan mahrum qilingandi.
Ma’lumot uchun, Odilxon Ismoilov 1977-yilda Namangan viloyatida tug‘ilgan, «Rayhon oilaviy milliy taomlari» ta’sischisi hisoblanadi.
U 2010-yildan Toshkent shahar bosh imom-xatibi o‘rinbosari bo‘lgan. 2011-yildan 2018-yil iyuligacha Shayxontohur tumani bosh imom-xatibi va «Shayx Zayniddin» jome masjidi imom-xatibi bo‘lib ishlagan. 2018 iyulda esa Musulmonlar idorasi Ismoilov «tasdiqlanmagan xabarlarni internet orqali tarqatgani va bemorligi vajidan vazifani uddalay olmayotgani sababli» ishdan olinganini ma’lum qilgan.
Odilxon Ismoilov 2019-yildan boshlab «Vaqf» xayriya jamoat fondida faoliyat yuritgan.
2019-yil fevralida Odilxon Ismoilov Shayxontohur tumani «Xo‘ja Alambardor» masjidiga imom-xatib etib tayinlangan. 2019-yil sentyabrida esa sog‘ligidagi muammolar tufayli o‘z xohishiga ko‘ra lavozimidan ozod etilgan.
U 2026-yil yanvarida o‘zlashtirish yoki rastrata yo‘li bilan talon-toroj qilish, soxta tadbirkorlik va boshqa ayblovlar bilan qamoqqa olingandi.
