Qozog‘iston hukumati Rossiyaga ishlagani borib, urush zonasida qolib ketgan fuqarolarini qaytarishga bel bog‘ladi
Rasmiy idora ushbu shaxslarni tezkorlik bilan vataniga qaytarish bo‘yicha diplomatiya kanallari orqali muzokaralarni davom ettirmoqda.
Ushbu jarayonga ijtimoiy tarmoqlarda tarqalgan videomurojaatlar sabab bo‘ldi. Unda qozog‘istonlik yoshlar Rossiyaga xususiy qo‘riqlash kompaniyalarida ishlash uchun borgani, biroq keyinchalik majburan jangovar harakatlar hududiga olib ketilganini bildirishgan. Yigitlarning ta’kidlashicha, urushda qatnashishdan bosh tortganlarga jinoiy javobgarlik va qamoq jazosi bilan tahdid qilingan.
Yuzaga kelgan vaziyat sabab Qozog‘iston tashqi ishlar vaziri Rossiyaning mamlakatdagi muvaqqat ishlar vakili Aleksandr Komarov bilan uchrashib, muammoni birgalikda hal etishga kelishib oldi. Shuningdek, vazirlik urush hududida qolgan fuqarolarning yaqinlaridan ularning shaxsiy ma’lumotlari, taxminiy joylashuvi hamda tuzilgan mehnat shartnomalarini taqdim etishni so‘ramoqda. Hozircha u yerda qancha fuqaro borligi va ularning aniq qaytarilish muddatlari ochiqlanmagan.
