Poytaxtning Qumariq mahallasida 2 gektarga yaqin maydonda sun’iy ko‘l barpo qilinmoqda
Bu Toshkentning barcha tumanlarida 12 ta sun’iy suv havzasini tashkil etish loyiasining bir qismidir.
Toshkent shahar hokimligi shaharning xalqaro aeroportiga yaqin joy — Sergeli tumanining Qumariq mahallasida 17 ming kvadrat metr (1,7 gektar) maydonda favvorali sun’iy ko‘l qurish boshlangani haqida xabar berdi. Ko‘l samolyotlarning qo‘nish yo‘lagi ostida joylashadi.
“Suv havzasi changni kamaytirish, havoni namlantirish va atrof-muhitda yanada qulay mikroiqlimni shakllantirishga xizmat qilishi kutilmoqda. Bu yerda aholi dam olishi, sayr qilishi va sport bilan shug‘ullanishi mumkin bo‘ladi”, — deyiladi hokimlik xabarida.
Ko‘l atrofidagi 5 gektar maydonda sayr, yugurish va velosiped yo‘lakchalari, bolalar maydonchalari, o‘rindiqlar va barbekyu hududlari barpo etiladi. Hozirda konstruksiyani armaturalash va mustahkamlash, shuningdek, ko‘lni saqlab turuvchi himoya devorini shakllantirish ishlari olib borilmoqda.
Hokimlik ta’kidlashicha, geologiya xulosalari hudud sun’iy ko‘l barpo etish talablariga muvofiq kelishini tasdiqlagan. Noyabrga qadar ko‘l atrofida uzunligi qariyb 800 metr bo‘lgan devor qurishni yakunlash va bo‘lajak ko‘l o‘zanidan tuproqni olib chiqish rejalashtirilgan, deya xabar beradi qurilish ishlari rahbari Axtam Hamroyev.
Shahar hokimligi ma’lumotlariga ko‘ra, hozirga qadar asosiy ishlarning 30 foizdan ortig‘i bajarilgan. Butun obyekt qurilishini yil oxirigacha yakunlash rejalashtirilmoqda.
Loyihachi Muhiddin Xoliqovning ta’kidlashicha, hududda kanallar va suv oqimlari bo‘lmagani sababli, sun’iy ko‘lni to‘ldirish uchun suv yerosti quduqlaridan olinadi.
“Suv 30 metr chuqurlikdan tortib olinib, ko‘lni to‘ldiradi. Avtomatik sezgichlar suv sathining pasayishi va ko‘tarilishini kuzatib boradi”, — deydi u.
Loyihada quyosh panellari, suvni filtrlash va ozonlash tizimlarini o‘rnatish ko‘zda tutilgan.
