O‘zbekistonning yangi avlod IT startaplari: 2025–2026
“StartupBlink Global Startup Ecosystem Index 2026” hisobotiga ko‘ra, mamlakat global reytingda 79-o‘rinni egalladi, yillik o‘sish sur’ati 227% ni tashkil etdi va “Yil mamlakati” deb topildi. Toshkent Markaziy Osiyodagi eng yaxshi startap shahri sifatida tan olindi. Bu yutuqlarga IT Parkning qo‘llab-quvvatlashi, xorijiy investorlarning qiziqishi va mahalliy innovatsion loyihalar asos bo‘lmoqda.
Quyida yaqin ikki yil ichida katta o‘sish qayd etgan milliy startaplarimiz haqida ma’lumot beramiz.
BILLZ — Retail avtomatlashtirish bo‘yicha yetakchi SaaS
BILLZ — do‘konlar uchun to‘liq avtomatlashtirish platformasi.
Bu startapga 2017-yilda Rustam Khamdamov, Vadim Zakharyan va Jahongir Chado tomonidan asos solingan. U POS kassa tizimi, tovar va ombor hisobi, CRM, moliyaviy hisobotlar, analitika va marketing vositalarini bir joyda taqdim etadi. Loyiha qog‘oz va Excel jadvallarini almashtirib, kichik va o‘rta biznesning samaradorligini oshiradi.
BILLZ hozirda 6000 dan ortiq do‘konda, shuningdek, O‘zbekiston va qo‘shni mamlakatlarda xizmat ko‘rsatmoqda. 2025-yil iyun oyida TBC Bank Group kompaniyaning dastlab 53% ulushini, keyinchalik 60% gacha 9–12 million dollar miqdorida sotib oldi. Bu O‘zbekistondagi so‘nggi yillardagi eng yirik M&A bitimlaridan biri bo‘ldi va kompaniyaning post-money bahosini taxminan 20 million dollarga yetkazdi.
TASS Vision — AI va computer vision asosidagi retail analitikasi
TASS Vision — sun’iy intellekt va kompyuter ko‘rish texnologiyalari asosida ishlaydigan innovatsion startap.Unga 2021-yilda Shahzod Umurzoqov, Jamshidjon Hakimjonov tomonidan asos solingan.
U do‘kon ichidagi kameralar orqali mijozlar oqimi, yoshi, jinsi va xulqini tahlil qiladi. Retailerlar uchun savdo maydonini optimallashtirish, marketing kampaniyalarini samarali o‘tkazish va mijoz tajribasini yaxshilash imkonini beradi. Edge AI texnologiyasi tufayli maxfiylik yuqori darajada saqlanadi.
Loyiha 10 mamlakatda 2000 dan ortiq do‘konda faol. 2025 yilda Czech Purple Ventures rahbarligida 1,3 million yevro investitsiya jalb qildi. IT Parkning muvaffaqiyatli startaplaridan biri bo‘lib, O‘zbekistonda deep tech yo‘nalishidagi eng yorqin namunadir.
GOINVEST — Kapital bozoriga kirishni soddalashtiruvchi ilova
GOINVEST — O‘zbekiston fond bozori uchun birinchi universal mobil ilova.Ilovaga 2024-yilda KAP DEPO investitsiya kompaniyasi tomonidan ishlab chiqilgan. KAP DEPO kompaniyaning o’zi 2005 yildan beri faoliyat yuritadi.
Shuningdek ushbu ilova chakana va institutsional investorlarga aktsiyalar va obligatsiyalar savdosi, real vaqt rejimida bozor tahlili va portfel boshqaruvi imkonini beradi. Masofaviy hisob ochish va past kirish to‘siqlari bilan oddiy fuqarolarning kapital bozoriga kirishini soddalashtiradi. StartupBlink reytingida O‘zbekistondagi eng yuqori o‘rinlarni egallagan loyihalardan biri hisoblanadi va mamlakatda moliyaviy inkluziyani oshirishga xizmat qilmoqda.
Hudhud Kids — Bolalar uchun ta’limiy mobil ilova
Hudhud Kids — yosh bolalar uchun maxsus ishlab chiqilgan interaktiv ta’limiy ilova.Ushbu ilovaga 2025-yilda ABUTECH MCHJ tomonidan asos solingan. Unda bolalar psixologiyasi va yoshiga mos filtrlangan animatsion kontent, o‘yinlar va mashqlar mavjud.
Loyiha oilalar orasida ommalashib, O‘zbekistonda bolalar uchun sifatli va xavfsiz raqamli ta’lim kontentini yaratish yo‘nalishida muhim o‘rin tutmoqda.
Yuqoridagi to‘rt loyiha O’zbekistonda ham startaplarning jadal rivojlanayotganining yaqqol yorqin namunalaridir. IT Parkning qo‘llab-quvvatlashi, davlat dasturlari va xalqaro investorlarning qiziqishi bilan O‘zbekiston Markaziy Osiyoda innovatsiyalar markaziga aylanmoqda. Kelgusi yillarda yangi investitsiyalar, xalqaro kengayish va yangi muvaffaqiyatli chiqishlar kutilmoqda.
