O‘zbekistonda yillik inflyatsiya 6,4 foizgacha sekinlashdi, ammo oziq-ovqat narxlari bir oyda 1 foizga qimmatladi
Milliy statistika qo‘mitasi ma’lumotlariga ko‘ra, mamlakatda yillik inflyatsiya ko‘rsatkichi 6,4 foizni tashkil etib, o‘tgan yilning mos davridagi 8 foizlik ko‘rsatkichga nisbatan sezilarli darajada pasaygan.
Oy davomidagi umumiy narx o‘sishiga eng katta ta’sirni oziq-ovqat mahsulotlari o‘tkazdi – ushbu guruh bir oyning o‘zida 1 foizga qimmatlashgan. Shuningdek, xizmatlar sohasida 0,9 foizlik, nooziq-ovqat tovarlarida esa 0,3 foizlik o‘sish kuzatildi. Yillik hisobda oziq-ovqat 6,3 foizga, xizmatlar esa 7 foizga ko‘tarilgan.
Sohalar kesimida eng yuqori yillik narx o‘sishi sug‘urta va moliyaviy xizmatlar (143,8 foiz) hamda kommunal soha va yoqilg‘i mahsulotlarida (111,8 foiz) qayd etildi. Eng past o‘sish sur’atlari esa uy-ro‘zg‘or buyumlari hamda kiyim-kechak va poyabzal bo‘limlarida kuzatildi.
Hududlar bo‘yicha sentyabrdagi oylik narx o‘sishi Surxondaryo viloyatida eng yuqori (0,99 foiz), Xorazmda esa eng past (0,64 foiz) bo‘ldi. Yillik inflyatsiya ko‘rsatkichi bo‘yicha poytaxt Toshkent shahri 7 foiz bilan yetakchilik qilmoqda, eng past ko‘rsatkich esa Sirdaryo viloyatida (5,4 foiz) qayd etilgan.
