O‘zbekistonda o‘simlik yog‘ini markirovkalashsiz sotish noqonuniy deb hisoblanib, javobgarlikka sabab bo‘ladi
Vazirlar Mahkamasining tegishli qarori loyihasi normativ-huquqiy hujjatlar portaliga joylashtirilgan bo‘lib, jamoatchilik muhokamasi 24-oktyabrgacha davom etadi.
Raqamli markirovkalash amaliyoti mahsulotning ishlab chiqaruvchidan to yakuniy xaridorgacha bo‘lgan butun zanjirini kuzatish imkonini beradi. Soliq qo‘mitasi ma’lumotlariga ko‘ra, mazkur mexanizm o‘simlik yog‘ining noqonuniy tayyorlanishi, mamlakatga yashirincha olib kirilishi hamda noformal savdosiga chek qo‘yishga xizmat qiladi. Tizim doirasida mahsulot idishlariga “Asl belgisi” kuzatuv tizimi orqali maxsus shtrix-kodlar tushiriladi.
Loyiha tasdiqlangan taqdirda, barcha ishlab chiqaruvchilar, importchilar va savdo korxonalari ushbu milliy tizimga ulanishi shart bo‘ladi. Tegishli kodga ega bo‘lmagan o‘simlik yog‘ini muomalaga chiqarish va sotish savdo qoidalarini buzish deb baholanadi hamda qonuniy javobgarlikka olib keladi. Boshqaruv stansiyalari tizim operatori CRPT Turon va Soliq qo‘mitasi tomonidan 2027-yil 1-yanvargacha tadbirkorlarga yetkazib beriladi.
Bundan tashqari, 2027-yil 1-yanvardan markirovka kodlarini birlashtiruvchi agregatsiya amaliyoti taklif etilmoqda. Bunda alohida idish va qutilar bitta transport qadoq kodi ostida jamlanib, mahsulotni tashish hamda saqlash hisobi soddalashtiriladi.
Mamlakatda raqamli markirovka 2020-yildan beri bosqichma-bosqich tatbiq etilmoqda va shu vaqtgacha tamaki, alkogol, dori-darmon, maishiy texnika hamda suv mahsulotlarini qamrab olgan.
