O‘zbekistonda Jamoat ahamiyatiga ega tashkilotlar reyestri kengaytirilib, ularning soni 449 taga yetkazildi
Belgilangan mezonlarga mos kelgan yana 24 ta tashkilot ro‘yxatga birinchi marta kiritilishi natijasida ularning umumiy soni 425 tadan 449 taga yetdi.
O‘rganishlar davomida ilgari ro‘yxatda bo‘lgan 17 ta tashkilot hozirgi talablarga to‘liq javob bermasligi ma’lum bo‘lgan. Biroq amaldagi tartibga muvofiq, hisobot berish, audit va korporativ boshqaruv uzluksizligini ta’minlash maqsadida ushbu tashkilotlar yana ikki yil davomida reyestrda saqlab qolinadi.
Yangi kiritilgan tashkilotlar uchun qat’iy moliyaviy talablar belgilangan. Xususan, 2026-yilda ro‘yxatga olingan subyektlar 2027-yil 1-yanvardan e’tiboran buxgalteriya hisobini Moliyaviy hisobotning xalqaro standartlari (MHXS) asosida yuritishga o‘tishi hamda 2028-yil yakuniga qadar audit xulosasi bilan birga e’lon qilishi shart.
Vazirlik ta’kidlashicha, ushbu ro‘yxatni muntazam yangilab borish moliyaviy hisob-kitoblar va audit shaffofligini oshirish, investorlar hamda jamoatchilik uchun ochiqlikni ta’minlashga xizmat qiladi. Yangilangan ro‘yxat hukumatning rasmiy portalida e’lon qilindi.
