O‘zbekistonda endi ishdan bo‘shatilganlarga uchinchi oy uchun o‘rtacha ish haqi to‘lanadi. Yo'riqnoma
O‘zbekistonda ayrim asoslarda ishdan bo‘shatilgan va ikki oy ichida ishga joylasha olmagan xodimlarga uchinchi oy uchun o‘rtacha oylik ish haqini to‘lash tartibi tasdiqlandi. Bu Vazirlar Mahkamasining 2026-yil 28-sentabrdagi 519-son qarori bilan rasman belgilandi.
Hujjatga ko‘ra, to‘lovni sobiq ish beruvchi amalga oshiradi. Buning uchun xodim mahalliy mehnat organiga murojaat qilib, tegishli tavsiyanomani olishi kerak.
Kimlar to‘lov olish huquqiga ega?
Tartib mehnat shartnomasi qonunchilikda belgilangan ayrim asoslar bo‘yicha bekor qilingan xodimlarga taalluqli. Ular ishdan bo‘shatilganidan keyin mahalliy mehnat organida ish qidirayotgan shaxs sifatida ro‘yxatdan o‘tishi va ikki oy davomida ishga joylasha olmagan bo‘lishi lozim.
Shuningdek, ariza beruvchi pensiya olish huquqiga ega bo‘lmasligi kerak. Ishdan bo‘shatilgan xodim uchinchi oy davomida ishga joylashsa, shu davr uchun o‘rtacha ish haqi to‘lanmaydi.
Qayerga va qachon murojaat qilish kerak?
Xodim ishdan bo‘shatilgan kundan boshlab 30 kalendar kun ichida yashash joyidagi tuman yoki shahar kambag‘allikni qisqartirish va bandlikka ko‘maklashish bo‘limiga murojaat qilishi lozim. Shuningdek, arizani Yagona interaktiv davlat xizmatlari portali orqali topshirish mumkin bo‘ladi.
Ariza uchun elektron so‘rovnoma to‘ldiriladi. Unda shaxsiy ma’lumotlar, ish tajribasi, kasbi va ishdan bo‘shatilish sababi ko‘rsatiladi. Ishdan bo‘shatish haqidagi buyruq nusxasi ham ilova qilinadi. Mehnat staji haqidagi ma’lumotlar tizimda to‘liq aks etmagan bo‘lsa, mehnat daftarchasi nusxasi so‘ralishi mumkin.
Tavsiyanoma qanday beriladi?
Mahalliy mehnat organi ariza va hujjatlarni tekshiradi. Ma’lumotlarda kamchilik bo‘lsa, uni tuzatish uchun besh ish kunigacha muddat beriladi. Ariza beruvchi ish qidirayotgan shaxs sifatida ro‘yxatga olingach, mehnat organi bu haqda elektron tavsiyanoma rasmiylashtiradi. Hujjat ariza beruvchiga va sobiq ish beruvchiga yuboriladi.
Uchinchi oy uchun to‘lov miqdori qonunchilikda belgilangan tartibda hisoblangan o‘rtacha ish haqiga teng bo‘ladi. To‘lovni ish beruvchi tavsiyanoma olinganidan keyin amalga oshiradi. Davlat xizmatini ko‘rsatish uchun yig‘im olinmaydi.
