O‘zbekistonda bolalar saratoniga qarshi 2035-yilgacha mo‘ljallangan Milliy reja tasdiqlandi
O‘zbekistonda onkologik va gematologik kasalliklarga chalingan bolalar va o‘smirlarga tibbiy yordam ko‘rsatish bo‘yicha 2035-yilgacha mo‘ljallangan Milliy reja tasdiqlandi. Bu haqda SSV xabar berdi.
Hujjat Prezidentning 2025-yil 19-maydagi bolalar saratoniga qarshi 2025–2030-yillarga mo‘ljallangan milliy dasturni amalga oshirish haqidagi qarori ijrosi doirasida ishlab chiqilgan va Jahon sog‘liqni saqlash tashkilotining global tashabbusiga uyg‘unlashtirilgan.
Dunyo bo‘yicha har yili 400 ming nafar bola va o‘smirda onkologik hamda gematologik kasalliklar aniqlanadi. Yuqori daromadli mamlakatlarda bunday bemorlarning besh yillik yashovchanlik darajasi 80 foizdan yuqori bo‘lsa, past va o‘rta daromadli davlatlarda bu ko‘rsatkich 20–30 foizni tashkil etadi.
“Rejaning maqsadi — bolaning qayerda yashashi va oilasining iqtisodiy holatidan qat’i nazar, kasallikni o‘z vaqtida aniqlash hamda samarali davolanish imkoniyatini ta’minlash”, — deyiladi vazirlik xabarida.
Bolalar saratonini erta bosqichda aniqlash ulushini 65 foizga yetkazish, bemorlarning barchasini ixtisoslashtirilgan tibbiy yordam bilan qamrab olish belgilangan.
Reja doirasida bolalarda onkologik va gematologik kasalliklarni erta aniqlash tizimi takomillashtiriladi. Hududlarda diagnostika xizmatlari qamrovi kengaytirilib, zamonaviy laboratoriya va instrumental tekshiruvlardan foydalanish imkoniyatlari oshiriladi. Target va immunoterapiya kabi ilg‘or davolash usullarini qo‘llash, soha uchun malakali tibbiy kadrlar tayyorlash va ularning kasbiy salohiyatini oshirish ham ko‘zda tutilgan.
Shuningdek, bolalar kanser-registri, elektron tibbiy karta va teletibbiyot kabi raqamli texnologiyalar joriy etiladi. Palliativ yordam, psixologik va ijtimoiy qo‘llab-quvvatlash hamda reabilitatsiya xizmatlari rivojlantiriladi.
