O‘zbekistonda AES qurishi kerak bo‘lgan “Rosatom”ning Misrdagi $30 mlrdlik loyihasida maxfiy mojaro fosh bo‘ldi
Aroniyadagi tekshiruvlar natijasida 1-, 2- va 3-energobloklar poydevorida texnik nuqsonlar, reaktor devorlarida bo‘shliqlar hamda qurilish sifati bo‘yicha ko‘plab kamchiliklar qayd etilgan. Buning ustiga, obyektda xodimlarning ichkilikbozlikka berilgani, soxta ruxsatnomalar orqali begona shaxslarning kirib yurgani hamda hududdan maxfiy foto-videolar tarqalgani aniqlangan. Ushbu muammolar sabab ilk energoblokni ishga tushirish muddati 18 oyga kechikib, 2030-yilga surilishi xavfi tug‘ilgan.
Umumiy qiymati 30 milliard dollarlik ushbu stansiya qurilishining 85 foizini Rossiya bergan davlat krediti qoplamoqda. “Rosatom” e’tirozlarni rad etib, barcha ishlar xalqaro standartlarga mos ketayotganini iddao qilgan bo‘lsa-da, shu kabi muammolar Vengriyada ham kuzatilmoqda.
Rossiya moliyalashtirayotgan Vengriyaning “Paksh-2” loyihasiga 2,8 milliard yevro sarflanganiga qaramay, obyektda hozircha faqat ikkita katta chuqurlik va bir nechta omborxona mavjud, xolos.
Ushbu xalqaro voqealar O‘zbekiston uchun ham o‘ta muhim hisoblanadi. Jizzax viloyatining Forish tumanida qurilishi rejalashtirilgan kichik quvvatli AES loyihasida ham aynan “Rosatom” tarkibidagi “Atomstroyeksport” bosh pudratchi sanaladi. Misr va Vengriyadagi holatlar loyihalarni amalga oshirishda pudratchi ustidan qat’iy nazorat, texnik tahlil va shaffoflik eng muhim omil ekanini ko‘rsatmoqda.
