O‘zbekiston eksportining asosiy xaridori ma’lum bo‘ldi
Yanvar-iyul oylarida mamlakat eksportining 50 foizdan ortiq qismi 10 ta asosiy hamkor davlat hissasiga to‘g‘ri keldi. O‘zbekiston mahsulotlari va xizmatlarining eng yirik xaridori 2,8 milliard dollar ko‘rsatkich bilan Rossiya bo‘ldi. Keyingi o‘rinlarni Xitoy (1,7 mlrd dollar) va Afg‘oniston (1,1 mlrd dollar) egalladi. Shuningdek, yirik bozorlar sirasiga Qozog‘iston, Fransiya, Gonkong, Turkiya, Qirg‘iziston, Tojikiston hamda BAA kiritildi.
Umumiy eksport hajmi o‘tgan yilning mos davriga nisbatan 3,6 foizga kamaygan bo‘lsa-da, monetar oltinni hisobga olmaganda tovar va xizmatlar eksporti 27,7 foizga oshib, 9,8 milliard dollarga yetdi. Shu bilan birga, tashqi savdoda oltinning ulushi o‘tgan yilgi 36,7 foizdan 14,1 foizgacha tushdi. Aksincha, xizmatlar ko‘rsatish ulushi 36,8 foizgacha (7,33 mlrd dollar) ko‘tarilib, eksport tarkibidagi eng katta ulushni egalladi.
Sohalar kesimida tekstil mahsulotlari eksporti 26,6 foizga oshib, 1,9 milliard dollarga yetgan bo‘lsa, meva-sabzavot yetkazib berish hajmi 1,03 milliard dollardan oshdi. Xizmatlar eksportining asosiy qismini turizm va safarlar (3,94 mlrd dollar), transport xizmatlari (2,32 mlrd dollar) hamda IT va telekommunikatsiya sohasi (622 mln dollar) tashkil etdi.
