O‘zbekiston akademik eshkak eshish tarixida ilk bor oltin medalni qo‘lga kiritildi
Niderlandiyaning Amsterdam shahrida davom etayotgan akademik eshkak eshish bo‘yicha jahon chempionatida O‘zbekiston terma jamoasi oltin medalni qo‘lga kiritib, tarixiy natijaga erishdi. Bu haqda Olimpiya qo’mitasi xabar berdi.
Yengil vaznli juftliklar (LM2x) dasturida Shahzod Nurmatov va Sobir Safaraliyev 2 kilometr masofani 6 daqiqa 21,93 soniyada bosib o‘tib, jahon chempioniga aylandi.
Bu O‘zbekiston akademik eshkak eshuvchilarining kattalar o‘rtasidagi jahon chempionatidagi ilk oltin medali bo‘ldi.
Sportchilar mazkur tarixiy medalni O‘zbekiston mustaqilligining 35 yilligiga bag‘ishlashini ma’lum qildi:
“Bu O‘zbekiston uchun birinchi medal. Musobaqalar qiziqarli va hayajonli o‘tdi. Biz bu medalni O‘zbekiston mustaqilligining 35 yilligiga bag‘ishlaymiz. Chunki bu — tarix, tarixda birinchi marta bo‘ldi. Murabbiyimiz bizga juda katta yordam berdi”, — deydi sportchi Shahzod Nurmartov.
LM2x finalida kumush medal Germaniya, bronza medal esa AQSh vakillariga nasib etdi. Akademik eshkak eshish bo‘yicha jahon chempionati 30-avgustgacha davom etadi.
