O‘g‘irlangan tushumlardan mijozning mummosigacha o‘rganuvchi startap: O‘zbekistonlik yigit asos solgan loyiha qanday dunyoga chiqmoqda?
Har bir startapning o‘z boshlanish nuqtasi bor, ammo "Tass Vision" laboratoriya yoki garajda emas, balki oddiy avtobusda boshlangan. “Tass Vision” startapi bugungi kunda sun’iy intellekt yordamida riteyl bizneslariga jismoniy do‘konlarni chuqur tahlil qilish imkonini beruvchi yechimlarni taqdim etmoqda. Portal24.uz bugun shu haqda hikoya qiladi.
Maktab davrida Shahzod Umirzakov otasining transport biznesiga qarashli avtobuslardan birida konduktor bo‘lib ishlaydi. O‘shanda u kundalik naqd tushumning qariyb 40 foizi kassaga yetib bormayotganini, haydovchi ва konduktorlar mablag‘ning bir qismini yashirayotganini payqab qoladi.
Yechim sifatida u infraqizil sensorlar yordamida yo‘lovchilarni hisoblaydigan ilk qurilmasini yaratadi. Tizim aniq tushumni hisoblab bera boshlagach, qurilma xarajatini 2 haftada qoplaydi va boshqa transport kompaniyalarida ham qiziqish uyg‘otadi.
Bundan tashqari, onlayn do‘konlar mijozning har bir harakatini kuzata oladi, biroq oddiy jismoniy do‘konlarda bunday imkoniyat yo‘q edi. “Tass Vision” aynan shu muammoni ham hal qildi. Sun’iy intellekt bilan ishlovchi kameralar yordamida tizim do‘konga kirgan mijozlar soni, yoshi va jinsini aniqlaydi, ularning do‘kon ichidagi harakatlarini tahlil qiladi, xarid qilmasdan chiqib ketish sabablarini ko‘rsatib, savdoni oshirish uchun aniq tavsiyalar beradi.
Dastlab loyiha restoran va qurilish kompaniyalari kabi ko‘plab sohalarga mahsulot taklif qildi, biroq natija kutilganidek bo‘lmadi. Tahlillar natijasida kompaniya o‘zining aniq mijoz profilini aniqlab oldi. Bugungi kunda asosiy mijozlar 5 tadan 300 tagacha filialga ega non-food riteyl tarmoqlari, elektronika, kosmetika do‘konlari, dorixonalar va fashion riteyl kompaniyalari.
“Tass Vision” uchun eng murakkab sinovlardan biri Turkiya bozori bo‘ldi. Kompaniya u yerda asosiy muammo texnologiya emas, balki mahalliy yirik mijozlar ishonchini qozonish ekanini tushundi. Shu sababli hozirda u yerda yuzma-yuz uchrashuvlar va uzoq muddatli hamkorlik aloqalariga e’tibor qaratilmoqda.
Global ekspansiyadagi xatolardan kelib chiqib, kompaniya bir vaqtning o‘zida ko‘p bozorlarga yopishmaslik xulosasiga keldi va hozirda asosiy e’tiborni 3 ta – O‘zbekiston, Qozog‘iston va Turkiya davlatiga qaratgan.
Kelgusi bosqichlarda Shimoliy Amerika, Janubi-Sharqiy Osiyo va Lotin Amerikasi bozorlariga chiqish rejalashtirilgan.
“Muvaffaqiyat diplom yoki iste’dod bilan emas, izchillik bilan belgilanadi. Muvaffaqiyatga erishishning yagona yo‘li – izchil mehnat qilish va to‘xtamaslikdir. Muvaffaqiyatning faqat 1 foizigina omadga bog‘liq”, deydi loyiha asoschisi.
Kompaniya 2025-yil yakunida break-even (zararsizlik) nuqtasiga chiqdi. Bugungi kunda investitsiyalar o‘sishga yo‘naltirilayotgan bo‘lsa-da, xarajatlar qat’iy nazorat qilinadi. Ichki tizimda esa takrorlanuvchi vazifalar sun’iy intellekt agentlariga topshirilgan bo‘lib, bu xodimlarga strategik rivojlanish uchun ko‘proq vaqt beradi.
