Nyu-Yorkdagi Empire State binosining cho‘qqisida “Marry me” qilgan rossiyalik juftlik 20 yilga qamalishi mumkin
Manxetten prokuraturasi Anjelina Nikolau va Ivan Birkusga 3 ta og‘ir jinoiy va bitta ma’muriy huquqbuzarlik bo‘yicha ayblov e’lon qildi. Agar sud ularni barcha ayblovlar bo‘yicha aybdor deb topsa, umumiy jazo 20 yildan ortiq qamoq tayinlanishi mumkin.
Politsiya xodimining ko‘rsatmasiga ko‘ra, juftlikning harakatlari ularni qo‘lga olishga kelgan politsiyachilar hayotini ham xavf ostiga qo‘ygan. Ular chiqqan bino tomidagi antenna inson salomatligiga zarar yetkazishi mumkin bo‘lgan yuqori chastotali radio signallarini uzatadi. Shu sababli politsiyachilar xavfsiz yaqinlasha olishi uchun antennaning elektr ta’minoti uzilgan va xodimlar taxminan yarim soat kutishga majbur bo‘lgan.
Juftlik, shuningdek, 1 500 AQSH dollaridan ortiq qiymatdagi mulkka zarar yetkazganlikda ham ayblanmoqda.
“Maxsus tezkor guruh voqea joyiga yetib kelganida, ular hali ham uzatuvchi antennaning ustida edi. Ularni yuqoridan tushirish oson bo‘lmadi. O‘z harakatlari bilan politsiya xodimlarini jiddiy xavf ostiga qo‘ydi”, – degan politsiya xodimi o‘z ko‘rsatmasida.
Joriy yilning 2-iyul kuni bo‘lib o‘tgan dastlabki sud eshituvlarida Anjelina Nikolau va Ivan Birkusga o‘zlariga qo‘yilgan ayblovlarni tan olmagan. Ularning advokati Jeyson Krinski ayblovlarni haddan tashqari og‘ir deya baholagan.
Sud qaroriga ko‘ra, juftlik garov puli to‘lamasdan ozod qilingan. Ish bo‘yicha navbatdagi sud majlisi 24-avgust kuni o‘tkaziladi.
Ma’lumot o‘rnida, juftlik 1-iyul kuni Nyu-Yorkdagi mashhur Empire State osmono‘par binosiga qo‘riqlash tizimini chetlab o‘tib, ruxsatsiz chiqqan edi. Ular binoning cho‘qqisiga ko‘tarilib, urushga qarshi mazmundagi bannerni yoygan va Ivan Birkus aynan shu yerda sevgilisiga turmush qurishni taklif qilgan.
