Nurobod va Toshkentni bog‘laydigan 350 kilometrlik yuqori kuchlanishli yangi elektr uzatish tarmog‘i qurilmoqda
Energetika vazirligi taqdim etgan ma’lumotga ko‘ra, to‘rtta viloyat – Samarqand, Jizzax, Sirdaryo va Toshkent hududini kesib o‘tuvchi ushbu obyektning umumiy uzunligi 350 kilometrni tashkil qiladi.
Ushbu yirik loyiha Saudiya Arabistonining ACWA Power kompaniyasi bilan sheriklikda amalga oshirilayotgan keng ko‘lamli energetika dasturining asosiy qismlaridan biridir. Dastur doirasida 1 000 MVt quvvatga ega quyosh elektr stansiyasi, 1 336 MVt·soat sig‘imdorlikdagi energiya saqlash tizimi hamda umumiy masofasi 500 kilometrga teng bo‘lgan tarmoqlar qurilishi ko‘zda tutilgan.
Ayni paytda 500 kVli tarmoq tayanchlari uchun poydevor qo‘yish bosqichi yakunlanib, ustunlarni o‘rnatish jarayoniga kirishildi. Mazkur liniyani foydalanishga topshirish 2028-yilning birinchi choragiga mo‘ljallangan.
Shuning bilan birga, majmuga kiruvchi 150 kilometrlik 220 kV kuchlanishli tarmoq qurilishi ham teng yarimga bajarilgan bo‘lib, bu obyektni 2027-yilning may oyida yakunlash rejalashtirilgan.
