Nega qozog‘istonlik tadbirkor o‘z startapini yuritish uchun Nukusni tanladi?
Ba’zi startaplar bozordagi imkoniyatlar, ba’zilari esa asoschining o‘z biznesidagi og‘riqli muammolar sabab yuzaga keladi. Qozog‘istonlik tadbirkor Aida Azamatkizi asos solgan “Ordo Holdings” startapi aynan ikkinchi holat mahsulidir. Portal24.uz shu haqda hikoya qiladi.
Aida Azamatkizi 2020-yilda o‘zining ilk bog‘chasini ochgan edi. Vaqt o‘tishi bilan bu tashabbus Qozog‘istonning 13 ta shahrida 55 dan ortiq bog‘chalarni qamrab olgan yirik tarmoqqa aylandi. Biroq masofalar uzoqligi sababli boshqaruv murakkablashgach, u jarayonlarni avtomatlashtirishga qaror qildi. Bog‘chalardan tushgan daromad hisobidan 500 ming dollardan ortiq investitsiya kiritilib, “Ordo” ERP platformasi ishlab chiqildi.
“Ordo” bog‘chalar uchun CRM, buxgalteriya va LMS vositalarini jamlagan all-in-one platformadir. Uning asosiy xususiyati – sun’iy intellekt yordamida bolalarning jismoniy, ijodiy va ijtimoiy ko‘nikmalarini tahlil qilib, ota-onalar hamda pedagoglar uchun individual tavsiyalar tayyorlashidadir.
Nega aynan Nukus?
Aida Azamatkizi 2025-yil sentabr oyida Nukusga keldi va noyabr oyida IT Park Qoraqalpog‘iston rezidentiga aylandi. IT Park unga birinchi yil uchun bepul ofis va “Zero Risk” dasturi doirasida texnik uskunalar ajratdi. Loyihani boshlash uchun Nukus tanlanganiga bir nechta omillar sabab bo‘ldi:
Til yaqinligi: Qozoq va qoraqalpoq tillarining o‘xshashligi kommunikatsiyani osonlashtiradi.
Arzon ishchi kuchi: Astanada 1000 dollar turadigan mutaxassis xizmati Nukusda taxminan 200 dollarni tashkil etadi, sifati esa deyarli bir xil.
Bozor shakllanmagani: Markaziy Osiyoda maktabgacha ta’limni boshqarish boihcha tayyor menejerlar kam, shu sababli jamoani noldan o‘qitish qulay hisoblanadi.
Ilk natijalar va global maqsadlar
Kompaniya O‘zbekistondagi savdo jarayonlarini 2026-yil fevral oxirida boshlagan bo‘lib, birinchi oyning o‘zidayoq 10 ta bog‘cha platformaga ulandi. Hozirda "Ordo" IT platformasining o‘zi 2 million dollar atrofida baholanmoqda. Startap marketing va savdo xarajatlari uchun yana 200 ming dollar investitsiya jalb qilishni rejalashtirgan.
Loyiha allaqachon Malayziyada pilot variantda ishga tushirilgan, shuningdek, MENA, Hindiston va Janubi-Sharqiy Osiyo bozorlariga chiqish choralari ko‘rilmoqda. Aida Azamatkizining maqsadi — Nukusdan chiqqan, yillik takroriy daromadi (ARR) 1 million dollardan ortiq bo‘lgan xalqaro EdTech kompaniyasini yaratishdir.Ba’zi startaplar bozordagi imkoniyatlar, ba’zilari esa asoschining o‘z biznesidagi og‘riqli muammolar sabab yuzaga keladi. Qozog‘istonlik tadbirkor Aida Azamatkizi asos solgan “Ordo Holdings” startapi aynan ikkinchi holat mahsulidir.
