“Navoiy suv ta’minoti” AJ 15,5 milliard so‘mlik xaridda qonun buzgani uchun moliyaviy jarimaga tortildi
Raqobatni rivojlantirish va iste’molchilar huquqlarini himoya qilish qo‘mitasi tadbirkorlik subyektining murojaati asosida ushbu tender savdolarini atroflicha o‘rganib chiqdi.
O‘rganish natijalariga ko‘ra, buyurtmachi tashkilot xarid jarayonida teng raqobat muhitini ta’minlamagani va “Raqobat to‘g‘risida”gi qonun normalariga rioya etmagani tasdiqlandi.
Aniqlangan holatlar yuzasidan Qo‘mitaning Maxsus komissiyasi tomonidan aksiyadorlik jamiyatiga nisbatan rasman ish qo‘zg‘atildi.
Komissiya surishtiruv yakunlari bo‘yicha “Navoiy suv ta’minoti” AJga nisbatan belgilangan tartibda moliyaviy jarima qo‘llash haqida qaror qabul qildi.
Shuningdek, mas’ullarga yo‘l qo‘yilgan qonun buzilishlarni zudlik bilan bartaraf etish hamda kelgusida bunday holatlarning takrorlanishiga yo‘l qo‘ymaslik bo‘yicha bajarilishi majburiy bo‘lgan ko‘rsatmalar berildi.
