“Men baribir oqlanaman”. Bloger Sirojiddin Odilov firibgarlik va tovlamachilikda ayblanib, 4 yilga qamaldi
Jizzax viloyati sudlari bergan rasmiy ma’lumotga ko‘ra, sud jarayonida uning qilmishlari to‘liq o‘z tasdig‘ini topgan.
Sud tergovi davomida blogerning bir fuqarodan tovlamachilik yo‘li bilan 12 million so‘m, boshqa ikki fuqarodan esa firibgarlik orqali 30 million va 33 million so‘m pul mablag‘larini qo‘lga kiritgani aniqlandi. Yetkazilgan umumiy 75 million so‘mlik moddiy zarar Adilov tomonidan to‘liq qoplangani bildirilgan.
Bloger so‘nggi so‘zida bir kun albatta oqlanishini bildirgan.
“Men qachondir baribir oqlanaman. Adolat albatta qaror topadi, ishonaman. Shu oqlovni bugun siz o‘qing”, degan Odilov sudyaga qarata.
Sud idoralari tomonidan alohida ta’kidlanishicha, ushbu jinoyat ishi doirasida Sirojiddin Odilovga uning ijtimoiy tarmoqlardagi blogerlik faoliyati bo‘yicha hech qanday ayblov qo‘yilmagan. Ayblov faqat fuqarolarning mol-mulkini noqonuniy yo‘llar bilan egallab olish holatlari bo‘yicha ko‘rib chiqilgan hamda tegishli hukm chiqarilgan.
