Mayami aeroportida Amazon yuk samolyoti halokatga uchrashi oqibatida besh kishi halok bo‘ldi
AQShning Mayami xalqaro aeroportida Amazon Air kompaniyasiga tegishli yuk samolyoti qo‘nish vaqtida uchish-qo‘nish yo‘lagidan chiqib ketib, halokatga uchradi. Hodisa oqibatida 5 kishi halok bo‘ldi, yana 5 kishi jarohatlandi. Bu haqda BBC xabar berdi.
Boeing 767-300 rusumidagi samolyot Puerto-Rikoning San-Xuan shahridan Mayamiga parvoz qilgan. Samolyot mahalliy vaqt bilan soat 14:00 atrofida qo‘nishga urinayotganda yo‘lakdan chiqib ketib, aeroport hududidagi bir nechta transport vositalariga urilgan.
Jarohatlanganlarning uch nafari og‘ir ahvolda. Qutqaruvchilar samolyot urilgan avtomobillarda yoki ularning ostida qolib ketgan ayrim jabrlanganlarni olib chiqishga majbur bo‘lgan.
Hodisa joyiga 200 dan ortiq o‘t o‘chiruvchi jalb qilingan. Samolyot qo‘nish vaqtida yonib ketgan, yong‘in o‘chirilgan bo‘lsa-da, voqea joyida yoqilg‘i sizib chiqishi davom etgan.
Hozircha halokatga nima sabab bo‘lgani ma’lum emas. Hodisani AQSh Milliy transport xavfsizligi kengashi (NTSB) tekshiradi.
Samolyot Amazon tomonidan ijaraga olingan bo‘lib, parvozni Shimoliy Karolinada joylashgan 21 Air charter kompaniyasi amalga oshirgan. Hodisa sabab aeroportdagi barcha reyslar vaqtincha to‘xtatilgan.
