Jizzaxda Zafarobod tuman hokimi yuk mashinasi bilan to‘qnashib, avtohalokatga uchradi
Joriy yiulning 30-avgust kuni Jizzax viloyatining Zafarobod tuman hokimi G‘ayratjon Eshpo‘latov boshqargan xizmat avtomobili yuk mashinasi bilan to‘qnashib, avtohalokatga uchradi. Bu haqda tuman hokimligi xabar berdi.
Ma’lum qilindiki, hodisa oqibatida tuman hokimi G‘ayratjon Eshpo‘latov va uning voyaga yetmagan o‘g‘li tan jarohatlari bilan shifoxonaning jonlantirish bo‘limiga yotqizilgan.
Hodisa Nurafshon mahallasi hududidan o‘tuvchi 25V-037 avtomobil yo‘lining 7-kilometrida yuz bergan.
Dastlabki ma’lumotlarga ko‘ra, B. Mo‘minov boshqaruvidagi MAZ rusumli yuk avtomobili Zafarobod yo‘nalishida harakatlanib, chap tomonga burilish vaqtida qarama-qarshi yo‘nalishda kelayotgan Zafarobod tumani hokimi G‘. Eshpo‘latov boshqaruvidagi “KIA Seltos” rusumli xizmat avtomobilining harakat yo‘liga chiqib ketgan va avtomobillar to‘qnashib ketgan.
YTH oqibatida tuman hokimi va mashinada yo‘lovchi sifatida bo‘lgan uning voyaga yetmagan o‘g‘li turli darajadagi tan jarohatlari olgan. Ular Respublika shoshilinch tibbiy yordam ilmiy markazining Jizzax filiali jonlantirish bo‘limiga yotqizilgan. “MAZ” haydovchisi esa jarohat olmagan.
Holat yuzasidan Zafarobod tuman prokuraturasi tomonidan Jinoyat kodeksining 266-moddasi 1-qismi bilan jinoyat ishi qo‘zg‘atilgan. Hozirda dastlabki tergov harakatlari olib borilmoqda.
