Jizzaxda 10 yoshli bolani 2 oy davomida zo‘rlab kelganlikda gumonlangan erkak joniga qasd qildi
Jizzaxda 53 yoshli erkak 10 yoshli bolaga ikki oy davomida muntazam jinsiy zo‘ravonlik qilganlikda gumonlanmoqda. Bola gumonlanuvchining turmush o‘rtog‘i tomondan yaqin qarindoshi bo‘lgan. Erkak bolani bu haqda birovga aytsa, o‘ldirish bilan qo‘rqitgan. Ma’lumot bo‘icha Portal24.uz tahririyati Bosh prokuraturaga so‘rov yubordi. Biroq so‘rovga javob berilmadi.
Ma’lum qilinishicha, muqaddam Jinoyat kodeksining 169-moddasi bilan sudlangan gumonlanuvchiga nisbatan Jinoyat kodeksining 119-moddasi 4-qismi bo‘yicha jinoyat ishi qo‘zg‘atilgan. Tergov doirasida u Jizzax shahar prokuraturasiga chaqirilgan.
Gumonlanuvchi prokuratura binosi oldiga kelgan, biroq huquqiy oqibatlardan qo‘rqib, ichki ishlar organlari xodimlaridan yashirinishga uringan. 3-oktabr kuni unga nisbatan qidiruv e’lon qilingan.
Tezkor-qidiruv tadbirlari davomida 4-oktabr kuni 53 yoshli erkak o‘ziga tegishli, qurilishi yakunlanmagan binoda o‘z joniga qasd qilgan holatda topilgan. Hozirda holat yuzasidan Jizzax shahar prokuraturasi va ichki ishlar bo‘limi tomonidan sud-tibbiy ekspertizasi tayinlangan, surishtiruv harakatlari davom etmoqda.
