Javohir Sindorov AQShda Daniel Naroditskiy xotira turniri g‘olibiga aylandi
Amerikalik taniqli grossmeyster, shaxmat sharhlovchisi va strimer Daniel Naroditskiy xotirasiga bag‘ishlab o‘tkazilgan nufuzli musobaqada o‘zbekistonlik shaxmatchi Javohir Sindorov yuksak mahorat namoyish etdi. Yetti tur yakuniga ko‘ra Sindorov 6 ochko jamg‘arishga muvaffaq bo‘ldi va turnir jadvalida hindistonlik grossmeyster Aravind Chitambaram bilan birinchi o‘rinni bo‘lishdi.
Dastur qoidasiga ko‘ra, g‘olib nomi blits tay-breyk bahslari orqali aniqlandi. Hal qiluvchi tay-breykda o‘zbekistonlik shaxmatchi raqibiga hech qanday imkoniyat qoldirmadi va har ikki partiyada ham g‘alaba qozonib, 2:0 hisobida zafar quchdi. Turnir davomida Sindorov jiddiy raqiblar – Shelev Oberoi, Niko Chasin, Mark Hayman, Robert Hess, Dariush Sverch, Oydin Sulaymonli hamda Aravind Chitambaram ustidan ishonchli g‘alabalarni qo‘lga kiritdi. Hamyurtimiz musobaqa davomida faqatgina amerikalik grossmeyster Endi Vudvordga qarshi bahsda yagona mag‘lubiyatni qabul qilib oldi.
Musobaqadagi g‘alabadan so‘ng Javohir Sindorov ushbu turnir o‘zi uchun naqadar yuksak ma’naviy ahamiyatga ega bo‘lganini alohida ta’kidlab o‘tdi:
“Men bu yerga shunchaki Daniel Naroditskiy xotirasi uchun shaxmat o‘ynashga keldim va bu jarayon menga juda yoqdi. Umid qilamanki, ushbu xotira turniri an’anaviy tarzda har yili o‘tkaziladi. Menimcha, Naroditskiy shaxmat olamidagi eng mehribon va samimiy insonlardan biri edi. Biz u bilan turli formatlarda mingdan ortiq shaxmat partiyalarida kuch sinashganmiz”, deya fikr bildirdi Sindarov.
Xotira turniri doirasidagi navbatdagi blits musobaqalari joriy yilning 4-iyul kuni davom ettiriladi.
