Isroilda Eron foydasiga josuslik qilgan Rossiya pasportiga ega tojikistonlik shaxs qo‘lga olindi
Isroil polisiyasi va Mudofaa vazirligi hamkorlikda o‘tkazilgan maxsus amaliyot natijasida Rossiya pasportiga ega bo‘lgan tojikistonlik Behruz Sobirjon qo‘lga olinganini rasman ma’lum qildi. U joriy yilning yanvar oyidan buyon Eron razvedka idoralari bilan yashirin aloqa o‘rnatib, ularning to‘g‘ridan-to‘g‘ri boshqaruvi ostida Isroil davlati xavfsizligiga qarshi qaratilgan topshiriqlarni bajarib kelganlikda ayblanmoqda.
Tergov xulosalariga ko‘ra, gumonlanuvchining xavfsizlikka tahdid soluvchi faoliyati asosan “Arslonlar na’rasi” urushi davriga to‘g‘ri kelgan. Isroil polisiyasi bayonotida qayd etilishicha, ushbu shaxs Eronning operativ yutuqlariga hamda xalqaro maydonda Isroilga qarshi strategik maqsadlarini ilgari surishiga faol yordam berishga uringan. Dastlab Behruz Sobirjon bilan oddiy ish taklifi niqobi ostida aloqaga chiqilgan, biroq u suhbatdoshlari Eron agentlari ekanini tezda anglab yetgan bo‘lsa-da, moddiy manfaatdorlik evaziga hamkorlikni davom ettirgan.
“The Times of Israel” nashrining xabar berishicha, mahalliy xavfsizlik xizmatlari tojikistonlik erkakning eronlik kuratoriga juda muhim va xavfli ma’lumotlarni yuborganini aniqlagan. XUsusan, u urush paytida Eron raketalari kelib tushgan aniq joylarning tafsilotlari, Tel-Aviv shahridagi yirik minoralarning koordinatalari hamda Hayfa portining batafsil suratlarini chet elga sizdirgan. Bundan tashqari, u Isroil shimolidagi o‘ta maxfiy xavfsizlik ob’yektini suratga olishga urinayotgan vaqtida kuzatuvga tushgan.
Mazkur murakkab tergov jarayoni Isroil polisiyasi, Mudofaa vazirligi va Isroilning ichki xavfsizlik agentligi bo‘lgan "Shin Bet" tomonidan hamkorlikda olib borildi. Ayni paytda qo‘lga olingan shaxsga nisbatan jinoyat ishi qo‘zg‘atilgan va sud jarayoniga tayyorgarlik ko‘rilmoqda.
Ma’lumki, Isroil va Tojikiston davlatlari o‘rtasida to‘g‘ridan-to‘g‘ri elchixonalar mavjud emas, biroq ikki mamlakat uchinchi davlatlardagi mintaqaviy elchixonalar va xalqaro tarmoqlar orqali cheklangan diplomatik aloqalarni saqlab keladi. Ekspertlar ushbu holat mintaqadagi yashirin razvedka urushining yangi bosqichi ekanini ta’kidlamoqda.
