Interpoldagi qidiruv ro‘yxatidan “Anorbank” aksiyadori Qahramonjon Olimovning nomi olib tashlandi
15-oktyabr holatiga ko‘ra, tashkilotning rasmiy saytida ushbu fuqaro bo‘yicha qidiruv natijalari ko‘rinmayapti.
Ma’lumot uchun, joriy yilning sentyabr oyida Qahramonjon Olimov xalqaro qidiruvga berilgani haqida xabarlar tarqalgan edi. Shundan so‘ng u “Anorbank” Kuzatuv kengashi tarkibidan chiqish bo‘yicha ariza topshirgan. Bank ushbu qarorni moliyaviy muassasa reytingiga salbiy ta’sir ko‘rsatayotgan omillarni bartaraf etish chorasi sifatida izohlagan edi. Keyinchalik, 8-oktyabr kuni "Fitch Ratings" xalqaro agentligi bankning uzoq muddatli emintent defolti reytingini “CCC+” darajasidan “CCC” darajasiga tushirdi.
Jurnalistik surishtiruvlarga ko‘ra, Olimov bir yil muqaddam Fransiyada o‘zining soxta o‘g‘irlanishini sahnalashtirgani uchun qidiruvga berilgan bo‘lishi mumkin. “The Insider” va “L’Express” nashrlari tarqatgan xabarga ko‘ra, u iqtisodiy nizoda bo‘lgan sobiq ish beruvchisi va tadbirkor Botir Rahimovni ayblash hamda uni 200 million dollardan ortiq moliyaviy da’volardan voz kechishga majbur qilish maqsadida ushbu jinoyatni o‘ylab topganlikda gumon qilingan.
