Anorbank aksiyadori Qahramonjon Olimov xalqaro qidiruvga berildi
Anorbank aksiyadorlaridan biri, moliyachi Qahramonjon Olimovga nisbatan Interpol saytida qizil bildirishnoma e’lon qilindi. Unda Olimov O‘zbekiston huquqni muhofaza qilish organlari tomonidan odam o‘g‘irlash, obro‘sizlantirish hamda noqonuniy ushlab turish yoki qamoqqa olish bilan bog‘liq gumonlar yuzasidan qidirilayotgani ko‘rsatilgan. Bildirishnomada ish tafsilotlari keltirilmagan. Qizil bildirishnoma xalqaro hibsga olish orderi emas: shaxsni ushlash masalasini har bir davlat o‘z qonunchiligiga muvofiq hal qiladi.
Anorbank Olimovning shaxsiy protsessual maqomi bankning kapitali, boshqaruvi yoki operatsiyalariga ta’sir qilmasligini bildirdi. Bank ma’lumotiga ko‘ra, 21-sentabr kuni Markaziy bank vakillari uning likvidligi, kapital yetarliligi va boshqa moliyaviy ko‘rsatkichlarini baholagan. Ushbu ko‘rsatkichlar belgilangan me’yorlar doirasida ekani, Anorbank esa odatdagi tartibda ishlayotgani ma’lum qilingan.
Avvalroq Olimovning o‘zi Fransiyada o‘g‘irlab ketilganini aytgan edi. Le Monde xabariga ko‘ra, 2025-yil 23-iyunda uni Parijda bir necha kishi mashinaga majburan o‘tqazib, keyinchalik Nitsadagi uyda ushlab turgan. Olimovning so‘zlariga ko‘ra, undan 10 million dollar talab qilingan; u qarzdorlik haqidagi hujjatni imzolab, 200 ming dollar to‘langanidan so‘ng qo‘yib yuborilgan. U Fransiya politsiyasiga murojaat qilgan, shifokorlar tanasida ko‘karish va jarohat izlarini qayd etgan. Fransiyada mazkur holat yuzasidan tergov boshlangan va gumonlanuvchilardan biri ushlangan.
Fransiyadagi voqea bilan Olimovga nisbatan O‘zbekistonda bildirilayotgan gumonlar o‘rtasidagi bog‘liqlik haqida hozircha rasmiy izoh berilmagan. Anorbank aksiyalarining 99,38 foizi Qahramonjon Olimovga tegishli bo‘lgan. Bank boshqaruvidagi aktivlar hajmi bir milliard dollardan oshgan.
