G‘uzorda ham yangi kon topildi
Sho‘rtan hududidagi yangi quduqni sinovdan o‘tkazish jarayonida sanoat miqyosidagi tabiiy gaz hamda kondensat oqimi qayd etildi.
Yangi quduqda burg‘ilash ishlari “O‘zneft burg‘ulash ishlari” MChJ tomonidan 5-avgust kuni boshlangan edi. Mutaxassislar qisqa fursat ichida 3 159 metr chuqurlikka qadar yetib borgan.
“O‘zbekgeofizika” AJ o‘tkazgan sinovlar davomida 2 842 metrdan 3 001 metrgacha bo‘lgan qatlamlardan yuqori bosimli gaz va kondensat oqimi olindi.
Hozirda mutaxassislar mahsuldor qatlamlar imkoniyatini har taraflama baholamoqda. Rejaga ko‘ra, sinovlar yakunlangach, olingan gaz qayta ishlash zavodlariga yo‘naltiriladi va so‘ngra iste’molchilarga yetkazib beriladi.
Bundan tashqari, joriy yil yakuniga qadar “Bo‘risoy” konida ikkinchi qidiruv qudug‘ini burg‘ilash ko‘zda tutilgan. Bu orqali hududdagi uglevodorod zaxiralari hajmi yanada aniqroq va batafsil baholanadi.
Avvalroq Mo‘ynoqdagi 4,7 ming metr chuqurlikdagi yangi quduqdan kuniga 500 ming kub metrgacha gaz olina boshlangandi.
