Facebook va Instagram bolalarni tarmoqqa qaram qilishda ayblanib, milliardlab dollar jarimaga tortilishi mumkin
Oklend shahrida boshlangan sud majlislarida shtatlar vakillari va Meta tomonining vajlari ko‘rib chiqilmoqda. Da’vogarlar kompaniya o‘smirlar ruhiy salomatligiga yetkazilayotgan zarardan xabardor bo‘lgan holda, foydalanuvchilarni tarmoqda uzoqroq ushlab turishga qaratilgan algoritmlarni qo‘llashda davom etganini ta’kidlamoqda. Ayblov tarafi o‘z da’volarini kompaniyaning ichki hisobotlari, xodimlar yozishmalari va hatto Mark Sukerbergga tegishli shaxsiy chat ma’lumotlari bilan isbotlashga urinmoqda.
Ayniqsa, yosh chegaralari bo‘yicha buzilishlar asosiy e’tirozlardan biriga aylandi. Kaliforniya rasmiylarining bildirishicha, Instagram’da millionlab 11-12 yoshli bolalar bor va kompaniya ularning ro‘yxatdan o‘tishini cheklash bo‘yicha yetarli chora ko‘rmagan. Meta esa bu raqamlar oshirib ko‘rsatilganini, aslida gap 100 ming atrofidagi foydalanuvchilar haqida ketayotganini aytib, o‘ziga qo‘yilgan ayblarni rad etmoqda.
Meta advokatlari taqdim etilayotgan ichki tadqiqotlar bir tomonlama talqin qilinayotganini, o‘smirlarning katta qismi ijtimoiy tarmoqlar ularning kayfiyatiga salbiy ta’sir ko‘rsatmasligini bildirishganini ta’kidlamoqda. Shunga qaramay, 29 shtat suddan kompaniyaga nisbatan yirik moliyaviy sanksiyalar qo‘llashni, shuningdek, platformalarda cheksiz lentani ko‘rish (skroll) hamda "layk"lar sonini ko‘rsatish funksiyalarini taqiqlash yoki o‘zgartirishni talab qilmoqda.
